ഗസ്സ: ഇസ്‌റാഈല്‍ നടത്തിയ തുരങ്ക ആക്രമണത്തില്‍ അപകടത്തില്‍പെട്ട ഫലസ്ഥീനികളെ ഇനിയും രക്ഷിക്കാനായില്ല. കഴിഞ്ഞയാഴ്ച ഖാന്‍ യൂനുസ് മേഖലയിലെ തുരങ്കപാതയ്ക്കുനേരെ ഇസ്‌റാഈല്‍ സൈന്യം നടത്തിയ ആക്രമണത്തില്‍ അകപ്പെട്ട അഞ്ചുപേരെയാണ് ഇനിയും കണ്ടെത്താനാകാത്തത്. ഹമാസ് പ്രവര്‍ത്തകരടക്കം ഏഴുപേര്‍ സംഭവത്തില്‍ കൊല്ലപ്പെട്ടിരുന്നു. നിരവധി പേര്‍ക്കു ഗുരുതരമായി പരുക്കേല്‍ക്കുകയും ചെയ്തിട്ടുണ്ട്.
തെക്കന്‍ ഗസ്സാ മുനമ്പിലുള്ള ഈ പ്രദേശം ഇപ്പോള്‍ ഇസ്‌റാഈല്‍ സൈന്യത്തിന്റെ നിയന്ത്രണത്തിലാണുള്ളത്. ഇവിടെ ഇസ്‌റാഈല്‍ ബഫര്‍ സോണായി(പരസ്പര ശത്രുതയുള്ള രാജ്യങ്ങള്‍ക്കിടയിലെ നിഷ്പക്ഷ മേഖല) പ്രഖ്യാപിച്ചിട്ടുണ്ട്. ഫലസ്ഥീനില്‍നിന്നുള്ള രക്ഷാപ്രവര്‍ത്തകരെയും സുരക്ഷാസേനയെയും ഇവിടെ പ്രവേശിക്കുന്നതു തടയുകയും ചെയ്തിട്ടുണ്ട്.