തിരൂരങ്ങാടി: ദാറുല്‍ഹുദാ ഇസ്‌ലാമിക് സര്‍വകലാശാലയുടെ ചീഫ് അഡ്മിസ്‌ട്രേറ്റീവ് ഓഫിസര്‍ പി.കെ നാസിര്‍ ഹുദവി കൈപ്പുറം യു.എസ് ഡിപ്പാര്‍ട്ട്‌മെന്റ് ഓഫ് സ്റ്റേറ്റ് സംഘടിപ്പിക്കുന്ന ലീഡര്‍ഷിപ്പ് ക്യാംപില്‍ പങ്കെടുക്കാന്‍ യാത്ര തിരിച്ചു.
കാനഡ,ജോര്‍ദാന്‍,ഫിലിപ്പൈന്‍സ് തുടങ്ങി പതിനൊന്നോളം രാഷ്ട്രങ്ങളിലെ വിദ്യാഭ്യാസ സാമൂഹിക രംഗത്ത് പ്രവര്‍ത്തിക്കുന്ന വ്യക്തികള്‍ക്കായി സംഘടിപ്പിക്കുന്ന ദ്വൈവാര ലീഡര്‍ഷിപ്പ് ക്യാംപില്‍ ഇന്ത്യയെ പ്രതിനിധീകരിച്ചാണ് നാസിര്‍ ഹുദവി പങ്കെടുക്കുന്നത്. ന്യൂയോര്‍ക്ക്, വാഷിങ്ടന്‍, ലോസ് ആഞ്ചലല്‍സ് തുടങ്ങിയ നഗരങ്ങളിലെ പ്രധാന സര്‍വകലാശാലകളും സംഘടനകളും സന്ദര്‍ശിക്കാനും വിവിധ മേഖലിയില്‍ പ്രവര്‍ത്തിക്കുന്നവരുമായി സംവദിക്കാനും അംഗങ്ങള്‍ക്ക് അവസരമുണ്ട്. ദാറുല്‍ഹുദാ മാനേജ്‌മെന്റ് പ്രതിനിധികളും അധ്യാപകരും വിദ്യാര്‍ത്ഥികളും പൂര്‍വ വിദ്യാര്‍ഥി സംഘടന ഹാദിയയും ചേര്‍ന്ന് യാത്രയയപ്പ് നല്‍കി.