ഹോചിമിന്‍സിറ്റി: ഇന്ത്യയുടെ വനിതാ ബോക്‌സിങ് ഇതിഹാസമായ വെറ്ററന്‍ താരം മേരികോം ഏഷ്യന്‍ ബോക്‌സിങ് ചാംപ്യന്‍ഷിപ്പിന്റെ സെമിയില്‍ പ്രവേശിച്ചു. 48 കിലോ ലൈറ്റ് ഫ്‌ളൈവെയ്റ്റില്‍ മത്സരിച്ച മേരി കോം ക്വാര്‍ട്ടറില്‍ ചൈനീസ് തായ്‌പേയ് താരം മെങ് ചി പിനിനെ പരാജയപ്പെടുത്തിയാണ് സെമിയിലേക്ക് കുതിച്ചത്. 34കാരിയായ താരം സെമിയില്‍ ജപ്പാന്‍ താരം സുബസ കൊമുറയുമായി ഏറ്റുമുട്ടും.

കഴിഞ്ഞ അഞ്ച് തവണയും ഏഷ്യന്‍ പോരില്‍ മത്സരിച്ച മേരി നാല് സ്വര്‍ണവും ഒരു വെള്ളിയും സ്വന്തമാക്കിയിരുന്നു. ഒരു വര്‍ഷത്തെ ഇടവേളയ്ക്ക് ശേഷമാണ് മേരി ഒരു അന്താരാഷ്ട്ര പോരില്‍ മെഡല്‍ ഉറപ്പിക്കുന്നത്.

മേരികോമിനൊപ്പം ഇന്ത്യയുടെ ശിക്ഷ, പ്രിയങ്ക ചൗധരി എന്നിവരും അവസാന നാലില്‍ ഇടംപിടിച്ചു. മൂന്ന് താരങ്ങള്‍ സെമിയിലെത്തിയതോടെ ഇന്ത്യ മൂന്ന് മെഡലുകളും ഉറപ്പാക്കി.