ദമാം : ദമാമില്‍ നടന്ന അണ്ടര്‍ 19 എ.എഫ്.സി യോഗ്യതാ മത്സരത്തില്‍ ഇന്ത്യക്ക് ദയനീയ പരാജയം. സഊദിക്കെതിരേ എതിരില്ലാത്ത അഞ്ചു ഗോളുകള്‍ക്കാണ് ഇന്ത്യ തോല്‍വി ഏറ്റു വാങ്ങിയത്. വന്‍പിന്തുണയുമായി കളത്തിലിറങ്ങിയ ഇന്ത്യന്‍ ടീമിന് വേണ്ടത്ര മികവ് പ്രകടിപ്പിക്കാനായില്ല. മലയാളികള്‍ ഉള്‍പ്പെടെ ആയിരങ്ങളാണ് ഇന്ത്യന്‍ ടീമിന് പിന്തുണയുമായി കളികാണാന്‍ സ്റ്റേഡിയത്തില്‍ എത്തിയിരുന്നത്.
എഷ്യന്‍ ഫുട്‌ബോള്‍ കോണ്‍ഫെഡറേഷന്‍ കപ്പിന്റെ ഗ്രൂപ്പ് ഡി യോഗ്യതാ മത്സരമാണ് ദമാമിലെ പ്രിന്‍സ് മുഹമ്മദ് ബിന്‍ ഫഹദ് സ്റ്റേഡിയത്തില്‍ അരങ്ങേറിയത്. കരുത്തരായ സഊദിക്കെതിരേ ഇന്ത്യന്‍ ടീം പിടിച്ചു നില്‍ക്കാന്‍ ഏറെ പണിപ്പെട്ടു. ആദ്യ പകുതിയില്‍ ഒരു ഗോള്‍ മാത്രം വഴങ്ങിയ ടീം പിടിച്ചുനിന്നെങ്കിലും രണ്ടാം പകുതിയില്‍ നാലു ഗോളുകള്‍ കൂടി വഴങ്ങി ദയനീയമായി തകര്‍ന്നടിയുകയായിരുന്നു. യെമന്‍,തുര്‍ക്ക്‌മെനിസ്ഥാന്‍ എന്നിവര്‍ക്കെതിരേയാണ് ടീമിന്റെ അടുത്ത രണ്ട് മത്സരങ്ങള്‍.