മാഡ്രിഡ്: സ്പാനിഷ് ലാ ലിഗയില്‍ വമ്പന്‍മാരായ ബാഴ്‌സലോണയ്ക്ക് മികച്ച ജയം. ഒന്നിനെതിരേ രണ്ടു ഗോളുകള്‍ക്ക് സെവിയ്യയെയാണ് പരാജയപ്പെടുത്തിയത്. പാക്കോ അല്‍സെസറിന്റെ ഇരട്ട ഗോള്‍ മികവിലാണ് ബാഴ്‌സലോണ ജയം പിടിച്ചത്. ജയത്തോടെ 11 കളിയില്‍ നിന്ന് 31 പോയിന്റുമായി ബാഴ്‌സ ഒന്നാംസ്ഥാനത്ത് തുടരുന്നു. മുഖ്യ എതിരാളികളായ റയല്‍ മാഡ്രിഡുമായി 11 പോയിന്റിന്റെ വ്യത്യാസമുണ്ട് ബാഴ്‌സയ്ക്ക്.
മത്സരത്തില്‍ 23ാം മിനുട്ടില്‍ ബാഴ്‌സ അക്കൗണ്ട് തുറന്നു. സെവിയ്യയുടെ പ്രതിരോധപിഴവില്‍ നിന്നാണ് അല്‍സെസര്‍ ഗോള്‍ നേടിയത്. ഇതിനിടയില്‍ മെസ്സി, ഇനിയേസ്റ്റ, റാക്കിട്ടിച്ച് എന്നിവരുടെ ഷോട്ട് പുറത്തേക്ക് പോയിരുന്നു. രണ്ടാംപകുതിയില്‍ പിസാരോ സമനില ഗോള്‍ നേടിയെങ്കിലും 65ാം മിനുട്ടില്‍ അല്‍സെസര്‍ വീണ്ടും രക്ഷ കനായതോടെ ബാഴ്‌സ തകര്‍പ്പന്‍ ജയം സ്വന്തമാക്കുകയായിരുന്നു.
മറ്റൊരു മത്സരത്തില്‍ ജിറോണ ഒന്നിനെതിരേ രണ്ടു ഗോളുകള്‍ക്ക് ലെവാന്റെയെ പരാജയപ്പെടുത്തി.