ദമാം: ദമാമിലെ ഖതീഫില്‍ സുരക്ഷാ സേനാംഗം വെടിയേറ്റു മരിച്ചു. കിഴക്കന്‍ പ്രവിശ്യയിലെ സ്ഥിരം സംഘട്ടനങ്ങള്‍ നടക്കുന്ന ശീഈ ഭൂരിപക്ഷ പ്രദേശമായ ഖത്വീഫിലെ അല്‍ ബഹ്രിരിയില്‍ തിങ്കളാഴ്ചയാണ് സംഭവം. ജോലിക്കിടെ അജ്ഞാതന്റെ വെടിയേറ്റ അബ്ദുള്ള ബദ്ര്‍ അല്‍ ഖഹ്താനി അല്‍ ഹസ (25) ആണ് കൊല്ലപ്പെട്ടത്. ഭീകരാക്രമണങ്ങളും വെടിവയ്പ്പും വ്യാപകമായ ഇവിടെ ഏതാനും ആഴ്ചകളായി സമാധാന അന്തരീക്ഷമായിരുന്നു.

ചെറുതും വലുതുമായ നിരവധി സ്‌ഫോടനങ്ങളും വെടിവയ്പ്പുകളും ഈ മേഖലയില്‍ നേരത്തെ വ്യാപകമായിരുന്നു. ഇതിനെതിരെ സുരക്ഷാ സേന ശക്തമായ നീക്കങ്ങളാണ് നടത്തി വരുന്നത്. ഇതിന്റൈ ഭാഗമായി നൂറ്റാണ്ടുകള്‍ പഴക്കമുള്ള ഒരു വില്ലേജ് തന്നെ പൊളിച്ചുമാറ്റിയിരുന്നു. ഇവിടെ ആധുനികവത്കരിക്കാനുള്ള പദ്ധതി നടന്നുവരികയാണ്.