തിരുവനന്തപുരം: ബി.ജെ.പി സംസ്ഥാന നേതൃത്വത്തില്‍ നിലനിന്നിരുന്ന ഗ്രൂപ്പ് സമവാക്യങ്ങള്‍ മാറുന്നു. സംസ്ഥാന പ്രസിഡന്റുമാരായിരുന്ന വി. മുരളീധരന്റേയും പി.കെ കൃഷ്ണദാസിന്റേയും പേരിലായിരുന്നു ഇതുവരെ ഗ്രൂപ്പുകള്‍ ഉണ്ടായിരുന്നത്.
കേന്ദ്ര നേതൃത്വവുമായി ഏറെ അടുപ്പമുണ്ടെന്നുള്ളതു കാരണം വി. മുരളീധരന്‍ പക്ഷത്തിനാണ് കൂടുതല്‍ സ്വാധീനമുണ്ടായിരുന്നതും. തമ്മിലടി കാരണം പ്രസിഡന്റ് സ്ഥാനത്തേക്ക് ഇരു ഗ്രൂപ്പുകളിലും പെടാത്ത പാര്‍ട്ടി അംഗം പോലുമല്ലാത്ത കുമ്മനത്തെ കേന്ദ്ര നേതൃത്വം കൊണ്ടുവരികയായിരുന്നു.
ഇപ്പോള്‍ കുമ്മനം പാര്‍ട്ടിയിലെ ഒരു അധികാര കേന്ദ്രമായപ്പോഴാണ് പുതിയ ഗ്രൂപ്പ് രൂപം കൊള്ളുന്നത്. പി.കെ കൃഷ്ണദാസിന്റെ നേതൃത്വത്തില്‍ പ്രവര്‍ത്തിച്ചിരുന്നവര്‍ ഇപ്പോള്‍ കുമ്മനത്തിനൊപ്പം ചേര്‍ന്നിരിക്കുകയാണ്.
സംസ്ഥാന അധ്യക്ഷനുള്ള സാധ്യതകള്‍ പ്രയോജനപ്പെടുത്തി വി. മുരളീധരനേയും സംഘത്തേയും ഒതുക്കാനുള്ള നീക്കങ്ങളാണ് കൃഷ്ണദാസിന്റെ നേതൃത്വത്തില്‍ ഇപ്പോള്‍ നടക്കുന്നത്.
ഇതിന്റെ ഭാഗമായാണ് ആലപ്പുഴയില്‍ അടുത്തിടെ നടന്ന സംസ്ഥാന കമ്മിറ്റി, കോര്‍ കമ്മിറ്റി യോഗങ്ങളിലെ തീരുമാനപ്രകാരം ചുമതലകളില്‍ മാറ്റം വരുത്തി കുമ്മനത്തിനും കൃഷ്ണദാസിനുമൊപ്പം നില്‍ക്കുന്നവര്‍ക്ക് സുപ്രധാന ചുമതലകള്‍ നല്‍കി വി. മുരളീധരനെയും സംഘത്തേയും തീര്‍ത്തും അവഗണിച്ചതും.
മുരളീധരനെ കര്‍ഷക മോര്‍ച്ചയെന്ന അപ്രധാന സംഘടനയുടെ ചുമതലയിലേക്ക് മാറ്റിയപ്പോള്‍ കെ. സുരേന്ദ്രനെ യുവമോര്‍ച്ചയുടെ ചുമതലയില്‍നിന്ന് ഒഴിവാക്കി.
എതിര്‍പക്ഷം മെഡിക്കല്‍ കോളജ് കോഴ വിവാദത്തില്‍ ഉള്‍പ്പെടെ ശക്തമായി എതിര്‍ത്തിരുന്നയാളും കൃഷ്ണദാസ് പക്ഷക്കാരനുമായ എം.ടി രമേശിന് സുപ്രധാന ചുമതലകള്‍ നല്‍കാനും കുമ്മനം പ്രത്യേകം ശ്രദ്ധിച്ചിട്ടുണ്ട്.