പള്ളിക്കര(കാസര്‍കോട്): ഔഷധ കൂട്ടുകള്‍ കൊണ്ട് മൂത്ര കല്ലിനെ അലിയിച്ച് കളയുന്നതില്‍ വിദഗ്ധനായ സിദ്ധ ഡോക്ടര്‍ റെനില്‍ രാജിന് ആയുഷ് ഇന്റര്‍നാഷണല്‍ സെമിനാറില്‍ പങ്കെടുക്കാന്‍ ക്ഷണം. ഭാരത സര്‍ക്കാറും വേള്‍ഡ് ആയുര്‍വേദ കോണ്‍ഗ്രസും ചേര്‍ന്ന് നാളെ മുതല്‍ 11 വരെ ദുബൈയിലാണ് സെമിനാര്‍ നടത്തുന്നത്. പാലക്കാട് സര്‍ക്കാര്‍ സിദ്ധ ഡിസ്‌പെന്‍സറിയില്‍ മെഡിക്കല്‍ ഓഫിസറാണ് ബേക്കല്‍ ഫോര്‍ട്ട് പള്ളിക്കര ശ്രീരാഗത്തിലെ റെനില്‍ രാജ്.
സിദ്ധവൈദ്യത്തിലെ അപൂര്‍വ ഔഷധ കൂട്ടുകളുടെ പേരെടുത്ത് പറഞ്ഞ് തയാറാക്കിയ പ്രബന്ധമാണ് ഈ നേട്ടത്തിലെത്താന്‍ ഇദ്ദേഹത്തെ പ്രാപ്തനാക്കിയത്. പള്ളിക്കരയിലെ റിട്ട. സെയില്‍ ടാക്‌സ് അസിസ്റ്റന്റ് കമ്മിഷണര്‍ ടി.ഗോപാലന്റെയും പ്രധാന അധ്യാപികയായി വിരമിച്ച കെ.എന്‍ രാജേശ്വരിയുടെയും മകനാണ്. പനയാല്‍ ആയുഷ് ഗവ. ഡിസ്‌പെന്‍സറിയിലെ മെഡിക്കല്‍ ഓഫിസര്‍ വി.കെ.ജിഷയാണ് ഭാര്യ. കേന്ദ്രീയ വിദ്യാലയത്തില്‍ ഒന്നാംതരത്തില്‍ പഠിക്കുന്ന ശ്രേയ പാര്‍വതി, ശ്രുതി കീര്‍ത്തി എന്നിവര്‍ മക്കളാണ്.