തൊടുപുഴ: 1000, 500 രൂപാ നോട്ടുകള്‍ അസാധുവാക്കിയതറിയാതെ ഇപ്പോഴും ഇടുക്കിയിലെ ഒരുവിഭാഗം ആദിവാസികള്‍. പെരിയാര്‍ കടുവാസങ്കേതത്തിനുള്ളില്‍ കഴിയുന്ന മലമ്പണ്ടാരം വിഭാഗത്തില്‍പെട്ട ആദിവാസികള്‍, ഒരു വര്‍ഷം പിന്നിട്ടിട്ടും നോട്ട് അസാധുവാക്കല്‍ ഒട്ടും അറിഞ്ഞിട്ടില്ല. 

വല്ലപ്പോഴുമാണ് ഇവരില്‍ച്ചിലര്‍ അങ്ങാടിയിലെത്തുന്നത്. ചില്ലറ സാധനങ്ങള്‍ മാത്രമേ വാങ്ങാനുള്ളുവെന്നതിനാല്‍ പത്തിന്റെയും അമ്പതിന്റെയും നൂറിന്റെയും നോട്ടാണു നല്‍കുക. പഴയ ആയിരത്തിന്റെയോ അഞ്ഞൂറിന്റെയോ നോട്ട് അപൂര്‍വമായി കൊണ്ടുവരും. അതു എടുക്കില്ലെന്നു പറഞ്ഞാല്‍ എന്താണു കാരണമെന്നൊന്നും ചോദിക്കാതെ ചില്ലറ തപ്പിയെടുത്തു നല്‍കും. ചില്ലറയില്ലെങ്കില്‍ തിരിച്ചുപോകും. പലരും തലയിണക്കടിയില്‍ 1000, 500 രൂപാ നോട്ടുകള്‍ നിധിപോലെ സൂക്ഷിച്ചിരിക്കുകയാണ്.
വനാന്തരഭാഗങ്ങളിലുള്ള പല ആദിവാസി കോളനികളിലും വൈദ്യുതിയും വാര്‍ത്താവിനിമയ സംവിധാനങ്ങളുമില്ല. ബാങ്കുകളില്‍ പണം സൂക്ഷിക്കുന്ന സ്വഭാവക്കാരല്ല ആദിവാസിസമൂഹം. വിളകള്‍ വിറ്റുലഭിക്കുന്ന തുക വീടുകളില്‍ സൂക്ഷിച്ചാണു ചെലവു നടത്തിവരുന്നത്.