കണ്ണൂര്‍: ഐ. എസ് ബന്ധമാരോപിച്ചു കണ്ണൂരില്‍ അറസ്റ്റു ചെയ്തവരെ ചോദ്യം ചെയ്യാന്‍ മറുനാടന്‍ പൊലിസ് സംഘങ്ങളുമെത്തി. മഹാരാഷ്ട്ര പൊലിസിന്റെ തീവ്രവാദവിരുദ്ധ സ്‌ക്വാഡായ എ.ടി.സ്, ആന്ധ്ര, തെലങ്കാന എന്നിവടങ്ങളിലെ ഡിവൈ. എസ്.പിമാരുടെ നേതൃത്വത്തിലുള്ള സംഘം എന്നിവരാണ് കണ്ണൂരിലെത്തിയത്. ഇവര്‍ പ്രതികളെ ചോദ്യം ചെയ്തു വരികയാണ്. നേരത്തെ റോ, ഇന്റലിജന്‍സ് ബ്യൂറോ, ദേശീയ കുറ്റാന്വേഷണ ഏജന്‍സി എന്നിവയുടെ പ്രതിനിധികളും കണ്ണൂരിലെത്തിയിരുന്നു. കണ്ണൂര്‍ ഡിവൈ.എസ്.പി പി.പി സദാനന്ദന്റെ അപേക്ഷയില്‍ പിടിയിലായ അഞ്ചുപേരെയും 15 ദിവസത്തെ പൊലിസ് കസ്റ്റഡിയില്‍ വിട്ടുകൊടുത്തിരുന്നു. പുറത്ത് നിന്നുള്ള അന്വേഷണ സംഘങ്ങളുടെ ചോദ്യം ചെയ്യല്‍ പൂര്‍ത്തിയായതിനു ശേഷം മാത്രമേ കണ്ണൂര്‍ പൊലിസിന് പ്രതികളുമായി തെളിവെടുപ്പ് നടത്താനാകൂ. അറസ്റ്റിലായ തലശ്ശേരി മുഴപ്പിലങ്ങാട്ടെ യു.കെ ഹംസ(57) തലശ്ശേരി കോടതിക്ക് സമീപത്തെ അബ്ദുല്‍ മനാഫ്(42) മുണ്ടേരി കൈപ്പക്കൈയില്‍ മൊട്ടയിലെ കെ.സി മിഥിലാജ്(20) ചെക്കിക്കുളത്തെ കെ.വി അബ്ദുല്‍ റസാഖ്(24) മുണ്ടേരി പടന്നോട്ട് മൊട്ടയിലെ എം.വി റാഷിദ്(23) എന്നിവരെയാണ് ചോദ്യം ചെയ്തുവരുന്നത്.