കൊട്ടിയം: കണ്ണനല്ലൂര്‍ ജങ്ഷനിലൂടെ അമിതവേഗതയില്‍ ബൈക്കോടിച്ചുവന്ന യുവാക്കളെ പിടിച്ചുനിര്‍ത്തി പിഴയടയ്ക്കാന്‍ ആവശ്യപ്പെട്ടതിനെ തുടര്‍ന്ന് ഒരുവിഭാഗം സംഘടിച്ചെത്തി വനിതാ പൊലിസിനെ തടഞ്ഞുവച്ചു. ഇന്നലെ വൈകിട്ട് ആറോടെയായിരുന്നു സംഭവം. ഇവര്‍ അമിതവേഗതയിലും ഹെല്‍മറ്റ് ധരിക്കാതെയുമായിരുന്നു ബൈക്കില്‍ സഞ്ചരിച്ചത്. ഇതേ തുടര്‍ന്ന് 100 രൂപ പിഴയടക്കണമെന്ന് പൊലിസ് ആവശ്യപ്പെട്ടു. എസ്.ഐ സ്ഥലത്തെത്തുന്നതുവരെയോ അല്ലെങ്കില്‍ കൊട്ടിയം സ്‌റ്റേഷനിലോ എത്തി പിഴയടയ്ക്കാന്‍ പൊലിസ് പറഞ്ഞുവെന്ന് ആരോപിച്ചാണ് നാട്ടുകാരില്‍ ചിലര്‍ സംഘം ചേര്‍ന്ന് വനിതാ പൊലിസിനേയും ഒരു ട്രാഫിക് വാര്‍ഡനെയും തടഞ്ഞുവച്ചത്.കൊട്ടിയം എസ്.ഐ സ്ഥലത്തെത്തിയെങ്കിലും നാട്ടുകാര്‍ ആദ്യം പിന്മാറാന്‍ കൂട്ടാക്കിയില്ല. കൂടുതല്‍ പൊലിസ് സ്ഥലത്തെത്തി സ്ഥിതി ശാന്തമാക്കി.  പിന്നീട് കൊട്ടിയം സി.ഐ
സ്ഥലത്തെത്തി നാട്ടുകാരുമായി ചര്‍ച്ച നടത്തി.
അമിതവേഗയില്‍ ഓടിച്ചുവന്നെന്ന കാരണത്താല്‍ ബൈക്ക് സ്‌റ്റേഷനിലേയ്ക്ക് മാറ്റി.