കൂത്തുപറമ്പ്: ബി.ജെ.പി പ്രവര്‍ത്തകന്റെ വീടിനോട് ചേര്‍ന്ന വിറകുപുരയില്‍ സ്‌ഫോടനം. സ്‌ഫോടനത്തില്‍ ഷെഡ് പൂര്‍ണമായും തകര്‍ന്നു. തുടര്‍ന്ന് പൊലിസ് നടത്തിയ പരിശോധനയില്‍ സമീപത്ത് നിന്ന് അര കിലോയോളം വെടിമരുന്നും പിടികൂടി. കൂത്തുപറമ്പിനടുത്ത് ആയിത്തറ കമ്പനിക്കുന്നിലെ ബി.ജെ.പി.പ്രവര്‍ത്തകന്‍ കല്ലാക്കുന്ന് ഹൗസില്‍ രഘൂത്തമന്റെ വീട്ടിലെ വിറകുപുരയിലാണ് ഇന്നലെ ഉച്ചയ്ക്ക് സ്‌ഫോടനമുണ്ടായത്. സ്‌ഫോടനത്തില്‍ വിറകുപുരയുടെ ഓടിട്ട മേല്‍ക്കൂരയും വീടിന്റെ ജനല്‍ ഗ്ലാസുകളും തകര്‍ന്നു. വിവരമറിഞ്ഞെത്തിയ കൂത്തുപറമ്പ് പൊലിസും കണ്ണൂരില്‍ നിന്നുള്ള ബോംബ് സ്‌ക്വാഡും സംയുക്തമായി നടത്തിയ പരിശോധനയിലാണ് വെടിമരുന്ന് കണ്ടെത്തിയത്.