പയ്യാവൂര്‍(കണ്ണൂര്‍): വീടിനകത്ത് മധ്യവയസ്‌കനെ ദുരൂഹസാഹചര്യത്തില്‍ മരിച്ച നിലയില്‍ കണ്ടെത്തിയ സംഭവം കൊലപാതകമെന്ന് തെളിഞ്ഞു. പാറക്കടവ് ഓര്‍ത്തഡോക്‌സ് പള്ളിക്ക് സമീപം താമസിക്കുന്ന കരിക്കോട്ടക്കരി സ്വദേശി തോണിപ്പാറയില്‍ ബാബു(52)വാണ് കൊല്ലപ്പെട്ടത്. സംഭവത്തില്‍ ബാബുവിന്റെ ഭാര്യ ആനിയും കാമുകന്‍ ജോബിയുമാണ് അറസ്റ്റിലായത്. ഇവര്‍ ബാബുവിനെ കഴുത്തില്‍ തോര്‍ത്തുമുണ്ട് മുറുക്കി ശ്വാസം മുട്ടിച്ചുകൊല്ലുകയായിരുന്നുവെന്ന് പൊലിസ് പറഞ്ഞു.
ബുധനാഴ്ച രാവിലെയാണ് ബാബുവിനെ വീടിന്റെ കിടപ്പുമുറിയില്‍ മുറിയില്‍ മരിച്ച നിലയില്‍ കണ്ടെത്തിയത്. സ്വാഭാവിക മരണമാണെന്നാണ് ഭാര്യ നാട്ടുകാരോട് പറഞ്ഞത്. എന്നാല്‍ ഇതില്‍ സംശയം തോന്നിയ അയല്‍വാസി പൊലിസിനെ അറിയിച്ചതോടെയാണ് പ്രതികളെ പിടികൂടാനിടയായത്. തുടര്‍ന്ന് പരിയാരം മെഡിക്കല്‍ കോളജ് ആശുപത്രിയില്‍ നടത്തിയ പോസ്റ്റുമോര്‍ട്ടത്തില്‍ കഴുത്തില്‍ തോര്‍ത്തുമുണ്ട് മുറുക്കി ശ്വാസംമുട്ടിച്ചു കൊല്ലുകയായിരുന്നുവെന്ന് വ്യക്തമായി. ബുധനാഴ്ച രാത്രി പത്തരയോടെയാണ് കൊല നടന്നത്. ജോബിയുമായി ആനിക്കുള്ള അടുപ്പം ഭര്‍ത്താവ് ബാബുവിന് അറിയാമായിരുന്നുവെന്നും ഇതുമായി ബന്ധപ്പെട്ട് ഇവര്‍ നിരന്തരം കലഹിച്ചിരുന്നുവെന്നും പൊലിസ് പറഞ്ഞു.