നിലമ്പൂര്‍: ഓന്‍പതാം ക്ലാസ് വിദ്യാര്‍ഥിനിയെ പീഡിപ്പിച്ച കേസില്‍ മൈസൂര്‍ സ്വദേശിയായ യുവാവ് പിടിയില്‍. മൈസൂര്‍ ഉദയഗിരി കല്യാണഗിരി സ്വദേശി ഇമ്രാന്‍ പാഷ (19)യെയാണ് എടക്കര പൊലിസ് അറസ്റ്റ് ചെയ്തത്. കേസിലെ ഒന്നാംപ്രതിയായ ആബിദ് എന്നയാളെ പൊലിസ് നേരത്തെ അറസ്റ്റ് ചെയ്തിരുന്നു.
കഴിഞ്ഞ ആഗസ്റ്റ് 24നാണ് കേസിനാസ്പദമായ സംഭവം. സ്‌ക്കൂളിലേക്ക് പോയ വിദ്യാര്‍ഥിനിയെ കാണാനില്ലന്ന പരാതിയില്‍ നടത്തിയ പൊലിസ് അന്വേഷണത്തിനിടെ ആഗസ്റ്റ് 30ന് എടവണ്ണയില്‍ നിന്ന് കുട്ടിയെ കണ്ടെത്തിയിരുന്നു.
കുട്ടിയെ കൗണ്‍സിലിങിന് വിധേയമാക്കിയതോടെ നിലമ്പൂര്‍ ബസ്സ്റ്റാന്‍ഡില്‍ വച്ച് പരിചയപ്പെട്ട ആബിദ് എന്നയാളാണ് തട്ടികൊണ്ട് പോയതെന്ന് ബോധ്യപ്പെട്ടു.
സെപ്തംബര്‍ 9ന് ആബിദിനെ എടക്കര പൊലിസ് പിടികൂടുകയും ചെയ്തിരുന്നു. കുട്ടിയെ വിവിധ സ്ഥലങ്ങളില്‍ വെച്ച് പീഡിപ്പിക്കുകയും ജോലി നല്‍കുമെന്ന് തെറ്റിധരിപ്പിച്ച് ഇമ്രാനെ പരിചയപ്പെടുത്തുകയുമായിരുന്നു.
മൈസൂരിലെ ലോഡ്ജില്‍ വച്ചാണ് ഇയാള്‍ കുട്ടിയെ പീഡനത്തിനിരയാക്കിയത്. ആബിദ് നല്‍കിയ മൊബൈല്‍ നമ്പര്‍ കേന്ദ്രീകരിച്ച് നടത്തിയ അന്വേഷണത്തിലാണ് ഇമ്രാന്‍ പിടിയിലായത്. മൈസൂര്‍ മാര്‍ക്കറ്റ് കേന്ദ്രീകരിച്ച് കഞ്ചാവ് വില്‍പ്പന നടത്തുകയായിരുന്നു ഇയാള്‍.
പെണ്‍കുട്ടിയുടെ സ്വര്‍ണാഭരണങ്ങള്‍ വിറ്റാണ് പ്രതികള്‍ കുട്ടിയുടെ കൂടെ ലോഡ്ജില്‍ താമസിച്ചത്. എടക്കര സിഐ അബ്ദുല്‍ ബഷീര്‍, എസ്.ഐ സജിത്, പ്രത്യേക അന്വേഷണ സംഘത്തിലെ എ.എസ്.ഐ എം. അസൈനാര്‍, സി.പി.ഒ മാരായ എന്‍.പി സുനില്‍, കെ. ജാബിര്‍ എന്നിവരടങ്ങിയ സംഘമാണ് പ്രതിയെ പിടികൂടിയത്. പ്രതിയെ നിലമ്പൂര്‍ കോടതി റിമാന്‍ഡ് ചെയ്തു.