നെടുമ്പാശ്ശേരി: കേരളത്തില്‍ നിന്നും ഈ വര്‍ഷം സംസ്ഥാന ഹജ്ജ് കമ്മിറ്റി വഴി ഹജ്ജ് കര്‍മം നിര്‍വഹിക്കാന്‍ അവസരം ലഭിച്ചിട്ടുള്ള തീര്‍ഥാടകരുടെ യാത്രാ ഷെഡ്യൂള്‍ കേന്ദ്ര ഹജ്ജ് കമ്മിറ്റിയില്‍ നിന്നും ലഭ്യമായി തുടങ്ങി. ഈ മാസം 22നാണ് ഹജ്ജ് കമ്മിറ്റിയുടെ നേതൃത്വത്തിലുള്ള തീര്‍ഥാടകരെയും വഹിച്ചുകൊണ്ട് സഊദി എയര്‍ലൈന്‍സിന്റെ ആദ്യ വിമാനം നെടുമ്പാശ്ശേരി അന്താരാഷ്ട്ര വിമാനത്താവളത്തില്‍ നിന്നും യാത്രയാകുന്നത്. 22 മുതല്‍ 27 വരെയുള്ള ദിവസങ്ങളിലെ തീര്‍ഥാടകരുടെ ഷെഡ്യൂളാണ് സംസ്ഥാന ഹജ്ജ് കമ്മിറ്റിക്ക് ഇതുവരെ ലഭ്യമായിരിക്കുന്നത്. ബാക്കിയുള്ള ദിവസങ്ങളിലെ ഷെഡ്യൂള്‍ ഉടന്‍ തന്നെ ലഭ്യമാകും. ഈ മാസം 21നാണ് ഹജ്ജ് ക്യാംപിന്റെ പ്രവര്‍ത്തനം ഔദ്യോഗികമായി ആരംഭിക്കുന്നത്.

അതേ സമയം, ഈ വര്‍ഷം ഹജ്ജ് കര്‍മ്മം നിര്‍വ്വഹിക്കാന്‍ കേരളത്തില്‍ നിന്നും 134 പേര്‍ക്ക് കൂടി അവസരം ലഭിച്ചു. ഇതില്‍ 51 സീറ്റുകള്‍ വിവിധ കാരണങ്ങളാല്‍ സംസ്ഥാനത്ത് നിന്നും അവസരം ലഭിച്ചവര്‍ യാത്ര റദ്ദ് ചെയ്തതാണ്. 83 സീറ്റുകള്‍ മറ്റ് സംസ്ഥാനങ്ങളില്‍ നിന്നും യാത്ര റദ്ദ് ചെയ്തവരുടെ സീറ്റുകളില്‍ നിന്നും കേന്ദ്ര ഹജ്ജ് കമ്മിറ്റി കൂടുതലായി അനുവദിച്ചു നല്‍കിയതാണ്. കാത്തിരിപ്പ് പട്ടികയില്‍ 523 വരെയുള്ളവര്‍ക്കാണ് ഇപ്പോള്‍ അവസരം ലഭിച്ചിരിക്കുന്നത്. പുതുതായി അവസരം ലഭിച്ചവര്‍ ഹജ്ജ് കമ്മിറ്റിയുമായി ബന്ധപ്പെട്ട് അനുവദിച്ച് കിട്ടിയിരിക്കുന്ന കാറ്റഗറി അനുസരിച്ചുള്ള മുഴുവന്‍ തുകയും മൂന്ന് ദിവസത്തിനകം അടക്കേണ്ടതാണ്.