തിരൂരങ്ങാടി: പ്രതിപക്ഷ നേതാവ് രമേശ് ചെന്നിത്തല മമ്പുറം മഖാമില്‍ സന്ദര്‍ശനം നടത്തി. യു.ഡി.എഫ് പടയൊരുക്കത്തിന്റെ ഭാഗമായി ജില്ലയിലെത്തിയ അദ്ദേഹം ഇന്നലെ രാവിലെയാണ് നേതാക്കള്‍ക്കൊപ്പം മമ്പുറം മഖാമിലെത്തിയത്. മമ്പുറം മഖാം സെക്രട്ടറി യു. ഷാഫി ഹാജിയുടെ നേതൃത്വത്തിലുള്ള സംഘം പ്രതിപക്ഷ നേതാവിനെ സ്വീകരിച്ചു.
ഇന്ത്യയുടെ സ്വാതന്ത്രസമരചരിത്രത്തില്‍ വലിയ സ്ഥാനമാണ് മമ്പുറം മഖാമിനുള്ളതെന്ന് രമേശ് ചെന്നിത്തല പറഞ്ഞു. മതേതരത്വത്തിന്റെ മകുടോദാഹരണമാണ് മമ്പുറം മഖാമെന്നും അദ്ദേഹം കൂട്ടിച്ചേര്‍ത്തു. അരമണിക്കൂറോളം മഖാമില്‍ ചെലഴിച്ച ചെന്നിത്തല തൊട്ടടുത്ത ഹിഫ്‌ള് കോളജിലും സന്ദര്‍ശനം നടത്തി.
യു.ഡി.എഫ് ജില്ലാ ചെയര്‍മാന്‍ പി.ടി അജയ്‌മോഹന്‍, ഡി.സി.സി പ്രസിഡന്റ് വി.വി പ്രകാശ്, ജാഥാ ജില്ലാ കോഡിനേറ്റര്‍ ഇ മുഹമ്മദ് കുഞ്ഞി, എ.പി അനില്‍കുമാര്‍ എം.എല്‍.എ, കെ.പി.സി.സി സെക്രട്ടറിമാരായ വി.എ കരീം, കെ.പി അബ്ദുള്‍ മജീദ് തുടങ്ങിയവരും പ്രതിപക്ഷ നേതാവിനോടൊപ്പമുണ്ടായിരുന്നു.