കണ്ണൂര്‍: ചെറിയ മരുന്നുകുപ്പികള്‍ കൊണ്ടു താജ്മഹലും സോഡയുടെ മൂടിയും പാഴ്തുണികളും കൊണ്ടു കഥകളിയും തല്‍സമയം ഉണ്ടാക്കിയ പിണറായി എ.കെ.ജി.എം.എച്ച്.എസ് സ്‌കൂളിലെ പ്ലസ് ടു വിദ്യാര്‍ഥിനി നീതിക സുമേഷ് ഹയര്‍സെക്കന്‍ഡറി വിഭാഗം പാഴ്‌വസ്തുക്കള്‍ കൊണ്ടുള്ള ഉത്പന്ന നിര്‍മാണ മത്സരത്തില്‍ ശ്രദ്ധനേടി. വെളുത്തുള്ളി, പിസ്തയുടെ തോട്, മുളകിന്റെ മൊത്ത്, ഈത്തപ്പഴത്തിന്റെ കുരു തുടങ്ങിയവയെല്ലാം നീതികയുടെ കരവിരുതില്‍ വിവിധ കരകൗശല വസ്തുക്കളായി. മൂന്നു വര്‍ഷമായി നീതികയ്ക്കായിരുന്നു ഈയിനത്തില്‍ സംസ്ഥാന ശാസ്ത്രമേളയില്‍ ഒന്നാംസ്ഥാനം. പാലയാട് സ്വദേശിയും ഇന്റീരിയര്‍ ഡിസൈനറുമായ എന്‍.പി സുമേഷ്-ധന്യ ദമ്പതികളുടെ മകളാണ്.