തളിപ്പറമ്പ്: നാട്ടുകാരെ ദുരിതത്തിലാക്കി ഇ.ടി.സി-പൂമംഗലം-മഴൂര്‍ റോഡ്. പൊട്ടിപ്പൊളിഞ്ഞ് ശോചനീയാവസ്ഥയിലുള്ള റോഡില്‍ വലിയ കുഴികളും വശങ്ങള്‍ ഇടിഞ്ഞ് ചാലുകള്‍ രൂപപ്പെട്ട് കല്ലുകള്‍ തെറിച്ച് നില്‍ക്കുന്നത് കാരണം കാല്‍നടപോലും ദുസഹമായെന്ന് പരാതിയില്‍ പറയുന്നു. പൂമംഗലത്തു നിന്നു കൂനത്തേക്കും അതുവഴി ചുഴലിയിലേക്കും എളുപ്പത്തില്‍ എത്തിച്ചേരാന്‍ സഹായിക്കുന്ന പൂമംഗലം പാലം തുറന്നു കൊടുത്തതോടെ ഈ റോഡിനെ ആശ്രയിക്കുന്ന വാഹനങ്ങളുടെ എണ്ണം വര്‍ധിച്ചിരുന്നു. എന്നാല്‍ റോഡ് പൂര്‍ണമായും തകര്‍ന്നതോടെ ഓട്ടോറിക്ഷകളും ഇരുചക്ര വാഹനങ്ങളും മറ്റു റോഡുകളെ ആശ്രയിക്കുന്ന സ്ഥിതിയാണ്. പൂമംഗലം ഭാഗത്തേക്ക് ഓട്ടോറിക്ഷകള്‍ ട്രിപ്പ് പോകാന്‍ തയാറാകാത്തതും ജനങ്ങള്‍ക്ക് വലിയ ബുദ്ധിമുട്ടുണ്ടാക്കുന്നുണ്ട്. ഇരുചക്ര വാഹനങ്ങള്‍ കുഴികളില്‍വീണ് അപകടമുണ്ടകുന്നതും പതിവാണ്. ഇ.ടി.സി-പൂമംഗലം-മഴൂര്‍ റോഡ് അറ്റകുറ്റപ്പണി നടത്തണമെന്നാവശ്യപ്പെട്ട് പൂമംഗലം സൗഹൃദ സ്വാശ്രയസംഘം ജയിംസ് മാത്യു എം.എല്‍.എക്കും പി.ഡബ്ല്യു.ഡിക്കും പരാതി നല്‍കി. കഴിഞ്ഞ ബജറ്റില്‍ ഇ.ടി.സി-പൂമംഗലം-മടക്കാട് 13.6 കിലോമീറ്റര്‍ റോഡ് വീതികൂട്ടി മെക്കാഡം ടാര്‍ ചെയ്യുന്നതിന് 20 കോടി രൂപ അനുവദിച്ചിട്ടുണ്ടെന്നും ഇതിന്റെ സാങ്കേതിക നടപടിക്രമങ്ങള്‍ പൂര്‍ത്തിയായി വരികയാണെന്നു എം.എല്‍.എ പറഞ്ഞു.