മാവൂര്‍: നിയന്ത്രണം വിട്ട ടിപ്പര്‍ 10 മീറ്ററോളം താഴ്ചയിലുള്ള വയലിലേക്കു മറിഞ്ഞു. രണ്ടുപേര്‍ നിസാര പരുക്കുകളോടെ അത്ഭുതകരമായി രക്ഷപ്പെട്ടു.
ഇന്നലെ രാവിലെ ഏഴു മണിയോടെ ചെറൂപ്പയിലാണ് സംഭവം. കോഴിക്കോട് ഭാഗത്തുനിന്ന് മാവൂരിലേയ്ക്കു പോകവേയാണ് ടിപ്പര്‍ അപകടത്തില്‍പെട്ടത്. ചെറൂപ്പ സി.എച്ച് സ്മാരക ഷോപ്പിംങ് സെന്ററിനു എതിര്‍വശത്തെ റോഡരികിലെ കൈവരികള്‍ തകര്‍ത്തശേഷം ഭീമന്‍ തണല്‍മരത്തിലിടിച്ചാണ് തണ്ണീര്‍ തടത്തിലേക്ക് മറിഞ്ഞത്.
ഇവിടെ റോഡരികില്‍ സുരക്ഷയ്ക്കായി കൈവരി നിര്‍മിക്കണമെന്ന ആവശ്യം ശക്തമാണ്. കഴിഞ്ഞ ദിവസം പെരുവയല്‍ ഭാഗത്തു നിന്ന് ചെറൂപ്പ ഭാഗത്തേക്കു വരികയായിരുന്ന കാര്‍ നിയന്ത്രണം വിട്ട് മരത്തിലിടിച്ച് പൂര്‍ണമായും തകര്‍ന്നിരുന്നു.