പെരിന്തല്‍മണ്ണ: വീണ്ടും വന്‍ കുഴല്‍പ്പണ വേട്ട. ആഡംബരക്കാരില്‍ കടത്തിക്കൊണ്ടു വരികയായിരുന്ന ഒരുകോടി പത്ത് ലക്ഷം രൂപയുടെ കുഴപ്പണവുമായി യുവാവ് പെരിന്തല്‍മണ്ണയില്‍ പ്രത്യേക അന്വേഷണ സംഘത്തിന്റെ പിടിയിലായി. പട്ടാമ്പി കൊപ്പം സ്വദേശി സൈനുദ്ദീന്‍ (37) ആണ് പെരിന്തല്‍മണ്ണ സി.ഐ ടി.എസ് ബിനുവിന്റെയും സംഘത്തിന്റെയും പിടിയിലായത്.
ജില്ലാ പൊലിസ് മേധാവിയുടെ നേതൃത്വത്തില്‍ നടത്തുന്ന പ്രത്യേക ഓപ്പറേഷനുകളുടെ ഭാഗമായി നടത്തിയ അന്വേഷണത്തിലാണ് പ്രതി വലയിലായത്. വാഹനപരിശോധനക്കിടെ തമിഴ്‌നാട്ടില്‍ നിന്ന് കൊണ്ടുവരികയായിരുന്ന പണവുമായി വെള്ളിയാഴ്ച രാത്രി 11ഓടെ പട്ടാമ്പി റോഡിലെ പോസ്റ്റ് ഓഫിസ് പരിസരത്ത് നിന്നാണ് ഇയാളെ പിടികൂടിയത്. മലബാര്‍ മേഖലയിലേക്ക് പണവും സ്വര്‍ണവും വിവിധ മേഖലകളിലൂടെ എത്തിച്ചുകൊണ്ടിരിക്കുന്നവരെക്കുറിച്ച് ഇയാളില്‍ നിന്ന് വിശദമായ വിവരം ലഭിച്ചതായും ഇവര്‍ നിരീക്ഷണത്തിലാണെന്നും അന്വേഷണ തലവന്‍ പെരിന്തല്‍മണ്ണ ഡി.വൈ.എസ്.പി എം.പി മോഹനചന്ദ്രന്‍ സുപ്രഭാതത്തോട് പറഞ്ഞു. പ്രതിയെ പെരിന്തല്‍മണ്ണ കോടതിയില്‍ ഹാജരാക്കി റിമാന്‍ഡ് ചെയ്തു.