നെടുമ്പാശ്ശേരി: വിമാനം തട്ടിക്കൊണ്ടു പോകുമെന്ന് ഭീഷണി മുഴക്കിയ യാത്രക്കാരനെ പൊലിസ് അറസ്റ്റ് ചെയ്തു. ഇന്ന് ഉച്ചയ്ക്ക് നെടുമ്പാശേരി അന്താരാഷ്ട്ര വിമാനത്താവളത്തിലായിരുന്നു സംഭവം. തൃശൂര്‍ സ്വദേശി ക്ലിന്‍സ് വര്‍ഗ്ഗീസിനെയാണ് നെടുമ്പാശ്ശേരി പൊലിസ് അറസ്റ്റ് ചെയ്തത്.

ഉച്ചയ്ക്ക് 11.30 ന് നെടുമ്പാശ്ശേരിയില്‍ നിന്നും മുംബൈയിലേക്ക് പുറപ്പെടുന്ന ജെറ്റ് എയര്‍വെയ്‌സ് വിമാനം തട്ടിക്കൊണ്ടു പോകുമെന്ന് ഇയാള്‍ സുഹൃത്തിനോട് പറയുകയായിരുന്നു. ഇത് കേട്ട സഹയാത്രികര്‍ വിവരം വിമാന ജീവനക്കാരെ അറിയിച്ചു. വിമാനം പറന്നുയരാന്‍ മിനിറ്റുകള്‍ മാത്രം ബാക്കിയുള്ളപ്പോഴായിരുന്നു സംഭവം.

വിമാന ജീവനക്കാര്‍ വിവരം നല്‍കിയതിനെ തുടര്‍ന്ന് നെടുമ്പാശ്ശേരി പൊലിസ് എത്തി ഇയാളെ കസ്റ്റഡിയിലെടുക്കുകയായിരുന്നു. പിന്നീട് മുഴുവന്‍ യാത്രക്കാരെയും വിമാനത്തില്‍ നിന്നും പുറത്തിറക്കിയ ശേഷം വിശദമായ പരിശോധന നടത്തി. ഇതിനു ശേഷമാണ് വിമാനം മുംബൈയിലേക്ക് പറന്നത്.