അമ്മാന്‍: ഐ.എസിന്റെ സിറിയയിലെ അവസാന ശക്തി കേന്ദ്രമായിരുന്ന അല്‍ബു കമാല്‍ പുര്‍ണമായും സിറിയന്‍ സൈന്യത്തിനു നഷ്ടമായി. ഇറാന്റെ നേതൃത്വത്തിലുള്ള സൈന്യം അല്‍ബു കമാല്‍ ദിവസങ്ങള്‍ക്കു മുന്‍പ് തിരിച്ചുപിടിച്ചിരുന്നു. എന്നാല്‍, പ്രദേശം മുഴുവനും ഐ.എസ് വീണ്ടും നിയന്ത്രണത്തിലാക്കിയെന്ന് യുദ്ധ നിരീക്ഷക സംഘം പറഞ്ഞു.
ഐ.എസിനെതിരേയുള്ള പോരാട്ടത്തില്‍ സിറിയന്‍, ഇറാന്‍ സൈന്യങ്ങള്‍ക്കൊപ്പം റഷ്യയുടെ സഹായം കൂടെ അല്‍ബു കമാലിലുണ്ടായിരുന്നു. തുരങ്കങ്ങളിലൂടെ അപ്രതീക്ഷിത അക്രമം നടത്തി ഐ.എസ് നഗരം വീണ്ടും കീഴടക്കുകയായിരുന്നുവെന്ന് നിരീക്ഷക സംഘം പറഞ്ഞു.
ചാവേറുകളെയും റോക്കറ്റാക്രമണവും ഉപയോഗിച്ചായിരുന്നു ഐ.എസിന്റെ തിരിച്ചടി. പിന്തിരിഞ്ഞോടുകയും കബളിപ്പിക്കുകയും പിന്നീട് സൈന്യത്തെ ഐ.എസ് വളഞ്ഞിട്ട് ആക്രമിക്കുകയുമായിരുന്നെന്ന് പ്രാദേശിക നേതാവായ ഗട്ടാന്‍ ഗനം പറഞ്ഞു. ഐ.എസിനെ പ്രതിരോധിക്കുന്നതിനിടെ സൈന്യത്തിനു വന്‍തോതില്‍ നാശനഷ്ടങ്ങളുണ്ടായി. അല്‍ബു കമാലിന്റെ സമീപത്തുള്ള നഗരം കേന്ദ്രീകരിച്ച് സൈന്യം ശക്തമായ ആക്രമണം ആരംഭിച്ചിട്ടുണ്ട്.
അല്‍ബു കമാല്‍ ഐ.എസില്‍ നിന്ന് തിരച്ചുപിടുച്ചുവെന്ന് വ്യാഴാഴ്ചയാണ് സിറിയന്‍ സൈന്യം പ്രഖ്യാപിച്ചത്. നിരവധി ഭീകരവാദികള്‍ കൊല്ലപ്പെട്ടെന്നും ഇതോടെ മൂന്നു വര്‍ഷമായുള്ള ഐ.എസിന്റെ നിയന്ത്രണം അവസാനിച്ചുവെന്നും സൈന്യം അറിയിച്ചിരുന്നു. അതിനിടെയാണ് ഐ.ഐസിന്റെ ശക്തമായ ആക്രമണം സൈന്യത്തിനെതിരേ ആരംഭിച്ചത്.