ചെറുവത്തൂര്‍: ഇനി നെല്ലുകുത്തി അരിയിക്കാന്‍ മില്ല് വരെ പോയി കാത്തുനില്‍ക്കേണ്ട ആവശ്യമില്ല. എളുപ്പത്തിലും ലാഭകരമായും നെല്ല് കുത്തിയെടുക്കാവുന്ന മിനി റൈസ് മില്‍ സബ്‌സിഡി നിരക്കില്‍ കര്‍ഷകര്‍ക്ക് ലഭിക്കും. ജില്ലയില്‍ കൃഷി വകുപ്പ് മുഖേന സബ്‌സിഡി നല്‍കി കര്‍ഷകരുടെ കൂട്ടായ്മയായ പാടശേഖര സമിതിയിലൂടെ മിനി റൈസ് മില്ല് എത്തിക്കാനാണ് കൃഷി വകുപ്പ് അധികൃതര്‍ ലക്ഷ്യമിടുന്നത്. വൈദ്യുതി ഉപയോഗിച്ച് പ്രവര്‍ത്തിക്കുന്ന മിനി മില്ലില്‍ ഒരു മണിക്കൂറില്‍ ഏതാണ്ട് 120 മുതല്‍ 150 കിലോഗ്രാം വരെ നെല്ല് കുത്തിയെടുക്കാം. 39,900 രൂപയാണ് വില. എന്നാല്‍ പാടശേഖര സമിതികള്‍ മുഖേന മിനി റൈസ് മില്ല് വാങ്ങുമ്പോള്‍ നാലായിരം രൂപ മാത്രം നല്‍കിയാല്‍ മതി. വൈദ്യുതി ചെലവ് കുറവായ ഈ ഉപകരണത്തില്‍നിന്ന് ഒരുകിലോ നെല്ല് കുത്തിയെടുക്കാന്‍ 30 പൈസ മാത്രമാണ് ചെലവെന്നും നിര്‍മാതാക്കള്‍ പറയുന്നു.