കോട്ടക്കല്‍: എടരിക്കോട് പി.കെ.എം.എച്ച്.എസ്.എസിലെ ഐ.ടി വിഭാഗത്തിന്റെ കീഴില്‍ പ്രവര്‍ത്തിക്കുന്ന 'കുട്ടിക്കൂട്ടം' ക്ലബ്ബിന്റെ ആഭിമുഖ്യത്തില്‍ സ്‌കൂളിന്റെ പ്രധാന വരാന്തകളിലെല്ലാം ഇന്റര്‍നെറ്റ് സൗകര്യത്തോടുകൂടിയ കംപ്യൂട്ടര്‍ സ്ഥാപിച്ച് വരാന്തയിലൊരു കംപ്യൂട്ടര്‍ പദ്ധതിക്ക് തുടക്കമായി. ഇടവേളകളിലും ഒഴിവുസമയങ്ങളിലും കംപ്യൂട്ടര്‍ ഉപയോഗിച്ച് പഠന പ്രവര്‍ത്തനങ്ങള്‍ നടത്തുന്നതിനാണ് പദ്ധതി ലക്ഷ്യമിടുന്നത്.
നഗരസഭ ചെയര്‍മാന്‍ കെ.കെ നാസര്‍ ഉദ്ഘാടനം ചെയ്തു. മാനേജര്‍ ബഷീര്‍ എടരിക്കോട് അധ്യക്ഷനായി. ജില്ലാ പഞ്ചായത്തംഗം ജമീല അബൂബക്കര്‍, ബ്ലോക്ക് പഞ്ചായത്തംഗം കെ.പി നാസര്‍, പ്രിന്‍സിപ്പല്‍ കെ മുഹമ്മദ് ഷാഫി, പ്രധാനാധ്യാപിക എസ്. ഖദീജാബി, പി. മുഹമ്മദ്, പി. ബഷീര്‍, ടി. അബ്ദുല്‍ ഗഫൂര്‍, കെ.പി അബ്ദുറഹിമാന്‍, കെ.ആര്‍ ഗണേഷ്, അഞ്ജിത സംസാരിച്ചു.