മലപ്പുറം: മുസ്്‌ലിംലീഗിന്റെ ജില്ലാ കമ്മിറ്റി ഭാരവാഹികളെ നാളെ തെരഞ്ഞെടുക്കും. നിലവിലുള്ള ജില്ലാ കമ്മിറ്റിയുടെ അവസാന പ്രവര്‍ത്തകസമിതി ഇന്നലെ ജില്ലാ ലീഗ് ഓഫിസില്‍ ചേര്‍ന്നു. വികസനത്തിനായി പൊളിച്ചുനീക്കുന്ന ഈ ഓഫിസില്‍ നടക്കുന്ന അവസാന പരിപാടിയായിരുന്നു ഇത്. അഞ്ചുവര്‍ഷം മുന്‍പ് നിലവില്‍വന്ന കമ്മിറ്റിയുടെ പ്രവര്‍ത്തന റിപ്പോര്‍ട്ടും വരവ് ചെലവ് കണക്കും അംഗീകരിക്കുന്നതിനായിരുന്നു ഇന്നലെ യോഗം ചേര്‍ന്നത്.
നാളെ റോസ് ലോഞ്ചില്‍ ജില്ലാ കൗണ്‍സില്‍ ചേര്‍ന്ന് പുതിയ ഭാരവാഹികളെ തെരഞ്ഞെടുക്കും. 1516 കൗണ്‍സിലര്‍മാരുടെ യോഗമാണ് ഇവിടെ നടക്കുക. പാണക്കാട് സയ്യിദ് സാദിഖലി ശിഹാബ് തങ്ങള്‍ പ്രസിഡന്റും പി. അബ്ദുല്‍ ഹമീദ് ജനറല്‍ സെക്രട്ടറിയുമായാണ് കാലവധി തീരുന്ന കമ്മിറ്റി നിലവില്‍ വന്നത്. പിന്നീട് എം.എല്‍.എ ആയതോടെ പി. അബ്ദുല്‍ ഹമീദ് സ്ഥാനം ഒഴിയുകയും കെ.എന്‍.എ ഖാദര്‍ ജനറല്‍ സെക്രട്ടറിയുമായി. വേങ്ങര ഉപതെരഞ്ഞെടുപ്പിനെ തുടര്‍ന്ന്് ഖാദര്‍ സ്ഥാനമൊഴിഞ്ഞതോടെ അഡ്വ.യു.എ ലത്തീഫ് ജനറല്‍ സെക്രട്ടറിയായി.
യോഗത്തില്‍ അരിമ്പ്ര മുഹമ്മദ് മാസ്റ്റര്‍ അധ്യക്ഷനായി.
ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പി, ട്രഷറര്‍ പി.വി അബ്ദുല്‍ വഹാബ് എം.പി, സംസ്ഥാന ജനറല്‍ സെക്രട്ടറി കെ.പി.എ മജീദ്, എം.എല്‍.എമാരായ പി.കെ അബ്ദുറബ്ബ്, പി. ഉബൈദുല്ല, ടി.വി ഇബ്രാഹീം, ജില്ലാ ഭാരവാഹികളായ കൊളത്തൂര്‍ ടി മുഹമ്മദ് മൗലവി, അഷ്‌റഫ് കോക്കൂര്‍, എം.കെ ബാവ, സലീം കുരുവമ്പലം, എം.എ ഖാദര്‍ തുടങ്ങിയവര്‍ പങ്കെടുത്തു.