തിരുവനന്തപുരം: ഹാദിയയെ സുപ്രിംകോടതിയില്‍ ഹാജരാക്കുന്നതിനുള്ള ഡല്‍ഹി യാത്ര വിമാനത്തിലാക്കണമെന്ന് ആവശ്യപ്പെട്ട് ഭര്‍ത്താവ് ഷെഫിന്‍ ജഹാന്‍ സംസ്ഥാന വനിതാ കമ്മിഷനെ സമീപിച്ചു. ട്രെയിന്‍ യാത്രക്കിടയില്‍ ഹാദിയക്ക് സുരക്ഷാപ്രശ്‌നങ്ങളോ മൊഴിമാറ്റത്തിന് സ്വാധീനമോ ഉണ്ടാകാന്‍ സാധ്യതയുണ്ടെന്ന് ഷെഫിന്‍ പറഞ്ഞു. യാത്ര വിമാനത്തിലാക്കാന്‍ കമ്മിഷന്‍ ഇടപെടണമെന്ന് ആവശ്യപ്പെട്ടുള്ള അപേക്ഷയും ഷെഫിന്‍ വനിതാ കമ്മിഷന് കൈമാറി. എന്നാല്‍, ഹാദിയയെ ഹാജരാക്കാന്‍ സുപ്രിംകോടതി നിര്‍ദേശിച്ചത് പിതാവിനോടാണെന്നും യാത്ര എങ്ങനെ ആകണമെന്ന് തീരുമാനിക്കേണ്ടത് പിതാവ് അശോകനാണെന്നും വനിതാ കമ്മിഷന്‍ അധ്യക്ഷ എം.സി ജോസഫൈന്‍ പറഞ്ഞു.
എവിടെയായിരുന്നാലും ഹാദിയയുടെ സുരക്ഷ സര്‍ക്കാര്‍ ഉറപ്പാക്കുമെന്നും ജോസഫൈന്‍ വ്യക്തമാക്കി. ഹാദിയയെ ഈ മാസം 27ന് ഹാജരാക്കാനാണ് സുപ്രിംകോടതി പിതാവ് അശോകനോട് ആവശ്യപ്പെട്ടിരിക്കുന്നത്.