പള്ളിക്കല്‍: ഗ്രാമത്തെ പ്ലാസ്റ്റിക് മുക്തമാക്കുന്നതോടൊപ്പം സ്ത്രീകള്‍ക്ക് സ്വയം തൊഴിലും എന്ന ലക്ഷ്യത്തോടെ പേപ്പര്‍ കവര്‍ പരിശീലനവുമായി വസന്തകുമാരി. പരിശീലനം ലഭിക്കുക വഴി പേപ്പര്‍ കവറുകളുണ്ടാക്കി വിപണിയിലിറക്കാന്‍ സാധിച്ചാല്‍ ഒരു പരിധി വരെ പ്ലാസ്റ്റിക്കിന്റെ ഉപയോഗം കുറക്കാനാകും.
ഇതുവഴി സാധാരണക്കാരായ സ്ത്രീകള്‍ക്ക് വീട്ടിലിരുന്ന് ചെയ്യാവുന്ന ഈ സ്വയം തൊഴിലിലൂടെ ഒരു വരുമാന മാര്‍ഗവുമാവുമെന്നാണ് സൗജന്യ പരിശീലനം നല്‍കാന്‍ തയാറായി എത്തിയ ചെറുകാവ് സ്വദേശി കെ.പി വസന്ത കുമാരി പറയുന്നത്.
പള്ളിക്കല്‍ കുടുംബശ്രീ ഓഫിസില്‍ കഴിഞ്ഞദിവസം ഇരുപതോളം കുടുംബശ്രീ അംഗങ്ങള്‍ക്ക് ഇവര്‍ പരിശീലനം നല്‍കി. പേപ്പര്‍ കവറുകള്‍ നിര്‍മാണം കുടുംബശ്രീ മുഖേന നടത്താന്‍ പദ്ധതി തയാറാക്കുമെന്നും താല്‍പര്യമുള്ളവര്‍ക്ക് പരിശീലനത്തിനുള്‍പ്പെടെ എല്ലാ വിധ സൗകര്യമൊരുക്കുമെന്നും പള്ളിക്കല്‍ ഗ്രാമ പഞ്ചായത്ത് കുടുംബശ്രീ ഓഫീസില്‍ നിന്നും അറിയിച്ചു.