കോഴിക്കോട്: ദേശീയപാതയില്‍ ടയറുകള്‍ കൂട്ടിയിട്ട് കത്തിച്ച് സമരം ചെയ്യുന്നവര്‍ക്കും പദ്ധതി വൈകിപ്പിക്കുന്ന ഉദ്യോഗസ്ഥര്‍ക്കുമെതിരേയും പൊതുമരാമത്ത് മന്ത്രി ജി. സുധാകരന്റെ രൂക്ഷ വിമര്‍ശനം. റോഡുകളില്‍ സമരക്കാര്‍ നടത്തുന്ന പേക്കൂത്തുകള്‍ ദൃശ്യമാധ്യമങ്ങളിലൂടെ കാണാന്‍ കഴിഞ്ഞെന്നും അഫ്ഗാനിസ്ഥാനോ, ഇറാഖോ അല്ല ഇതു കേരളമാണെന്നുമായിരുന്നു റോഡില്‍ ടയറിന് തീയിട്ട് സമരം ചെയ്യുന്നവരോട് പൊതുമരാമത്ത് മന്ത്രി പറഞ്ഞത്.
ഏതെങ്കിലും ഒരു പ്രവൃത്തിക്ക് ഭരണാനുമതി ലഭിച്ച് സാങ്കേതികാനുമതി ലഭ്യമാക്കേണ്ടവര്‍ വര്‍ഷങ്ങള്‍ വൈകിപ്പിക്കുന്നത് എന്തിനാണെന്നും ശൂന്യാകാശത്തുനിന്ന് കൊണ്ടുവരേണ്ടതല്ല ഭരണാനുമതിയും സാങ്കേതികാനുമതിയും എന്നും ഉദ്യോഗസ്ഥരെയും ജനപ്രതിനിധികളെയും സദസിലിരുത്തി അദ്ദേഹം പറഞ്ഞു. നഗരപാത വികസന പദ്ധതിയുടെ രണ്ടാംഘട്ടത്തില്‍ 47 കിലോമീറ്റര്‍ റോഡ് നിര്‍മിക്കുമെന്നും സ്ഥലം എം.എല്‍.എ ഏതു പാര്‍ട്ടിക്കാരനാണെന്ന് നോക്കാതെ പൊതുമരാമത്ത് വകുപ്പ് പദ്ധതികള്‍ ആവിഷ്‌കരിക്കുമെന്നും മന്ത്രി പറഞ്ഞു.
എം.എല്‍.എമാരായ പ്രദീപ്കുമാറും മുനീറും സമര്‍പ്പിച്ച പൊതുമരാമത്ത് വകുപ്പിനു കീഴില്‍ വരുന്ന എല്ലാ പ്രവൃത്തികളും സമയബന്ധിതമായി നടപ്പാക്കുമെന്നും ആറു റോഡുകളുടെ ഉദ്ഘാടന ചടങ്ങില്‍ അധ്യക്ഷത വഹിച്ചു സംസാരിക്കവെ സുധാകരന്‍ കൂട്ടിച്ചേര്‍ത്തു.