തലശ്ശേരി: കഞ്ചാവ് കേസിലെ മുഖ്യപ്രതി കഞ്ചാവുമായി വീണ്ടും എക്‌സൈസ് സംഘത്തിന്റെ പിടിയിലായി. വടക്കുമ്പാട് എരഞ്ഞോളിയിലെ കാരാട്ട് കുന്നുമ്മലിനടുത്ത് എടത്തട്ട വീട്ടില്‍ പി. നാസറി(50) നെയാണ് തലശ്ശേരി എക്‌സൈസ് ഇന്‍സ്‌പെക്ടര്‍ മനോഹരന്‍ പയ്യനും സംഘവും പിടികൂടിയത്. തലശ്ശേരി ഗവ. ആശുപത്രിക്ക് സമീപം കടപ്പുറത്തേക്ക് പോകുന്ന റോഡില്‍ 1.2 കിലോ ഗ്രാം കഞ്ചാവ് സഹിതം പിടികൂടിയത്.
ചെറുകിട കച്ചവടക്കാര്‍ക്ക് വില്‍പന നടത്താന്‍ വേണ്ടിയാണ് ഇയാള്‍ തിരുപ്പൂരില്‍ നിന്ന് കഞ്ചാവ് എത്തിച്ചത്. തലശ്ശേരി റെയിഞ്ച് എക്‌സൈസ് ഓഫിസില്‍ ഏഴു കിലോ കഞ്ചാവ് കൈവശം വച്ച കുറ്റത്തിന് ഇയാള്‍ക്കെതിരേ കേസുണ്ട്. ഒരു മാസത്തോളമായി ഇയാള്‍ എക്‌സൈസ് സംഘത്തിന്റെ നിരീക്ഷണത്തിലായിരുന്നു. കടല്‍പാലം ഭാഗങ്ങളില്‍ പട്രോള്‍ നടത്തവെയാണ് ഇയാള്‍ പിടിയിലാവുന്നത്. പ്രതിയെ വടകര നാര്‍ക്കോട്ടിക് കോടതിയില്‍ ഹാജരാക്കി.