കണ്ണൂര്‍: മീസില്‍സ് റൂബെല്ല പ്രതിരോധ കുത്തിവയ്പ്പ് സ്‌കൂളുകളുടെ ഉത്തരവാദിത്തമായി കണ്ട് വിജയിപ്പിക്കാന്‍ എല്ലാ സ്ഥാപന മേധാവികളും തയാറാകണമെന്ന് കലക്ടര്‍ മീര്‍ മുഹമ്മദലി നിര്‍ദേശിച്ചു. നിരക്ഷരരോ വേണ്ടത്ര വിദ്യാഭ്യാസമില്ലാത്തവരോ ആയ ഏതാനും രക്ഷിതാക്കളുടെ അഭിപ്രായമല്ല, കുട്ടികളുടെ ഭാവിയാണ് ഇക്കാര്യത്തില്‍ പ്രധാനമെന്നും അദ്ദേഹം പറഞ്ഞു. സ്‌കൂള്‍ ഹെഡ്മാസ്റ്റര്‍മാര്‍, മാനേജര്‍മാര്‍, പി.ടി.എ ഭാരവാഹികള്‍ എന്നിവരുടെ യോഗത്തില്‍ സംസാരിക്കുകയായിരുന്നു അദ്ദേഹം. ചിലയിടത്തൊക്കെ എതിര്‍പ്പുമായി വരുന്നത് രക്ഷിതാക്കളല്ലാത്ത ചിലരാണ്. ഇത്തരക്കാരെ അറസ്റ്റ് ചെയ്ത് നിയമ നടപടിയെടുക്കും.
ജില്ലയില്‍ 71.22 ശതമാനം കുട്ടികള്‍ ഇതിനകം കുത്തിവയ്പ്പ് എടുത്തു. 5,93,129 കുട്ടികളില്‍ 4,22,426 പേര്‍ ഇതിനകം കുത്തിവയ്‌പ്പെടുത്തു. നേരത്തെ ഏറ്റവും പിറകിലായിരുന്ന സ്‌കൂളുകളില്‍ ഭൂരിപക്ഷത്തിലും 80ഉം 90ഉം ശതമാനമായി കുത്തിവയ്പ്പ് നിരക്ക് ഉയര്‍ന്നത് ഇതിന്റെ തെളിവാണ്. നേരത്തെ 20 ശതമാനത്തില്‍ കുറവ് മാത്രം ഉണ്ടായിരുന്ന 56 സ്‌കൂളുകളില്‍ 10ഓളം സ്‌കൂളുകളില്‍ 80ഉം 90ഉം ശതമാനമായി നിരക്ക് ഉയര്‍ന്നു. ഈ സ്‌കൂളുകളുടെ പ്രവര്‍ത്തനത്തെ കലക്ടര്‍ ശ്ലാഘിച്ചു.
കണ്ണൂര്‍ കേന്ദ്രീയ വിദ്യാലയത്തില്‍ 99 ശതമാനം കുട്ടികളും കുത്തിവയ്പ്പ് എടുത്തു.
മികച്ച പ്രവര്‍ത്തനം നടത്തിയ സ്‌കൂളുകള്‍ക്ക് ചടങ്ങില്‍ അനുമോദന പത്രം സമ്മാനിച്ചു. ഡി.എം.ഒ ഡോ. കെ. നാരായണ നായ്ക്ക്, ഡി.പി.എം ഡോ. ലതീഷ്, ഡെപ്യൂട്ടി ഡി.എം.ഒ ഡോ. രേഖ സംസാരിച്ചു.