മുള്ളേരിയ: വ്യാജ രേഖയുണ്ടാക്കിയും ആള്‍മാറാട്ടം നടത്തിയും വൃദ്ധയുടെ വസ്തു തട്ടിയെടുത്തതായി പരാതി. കണ്ണൂര്‍ വില്ലേജിലെ നാവൂരിലെ പരേതനായ ശങ്കു പൂജാരിയുടെ ഭാര്യ ശേഷമ്മ (82)യാണു ജില്ലാ കലക്ടര്‍, ബദിയടുക്ക സബ് രജിസ്ട്രാര്‍, ദേലംപാടി വില്ലേജ് ഓഫിസ്, ആദൂര്‍ പൊലിസ് എന്നീവിടങ്ങളില്‍ പരാതി നല്‍കിയത്. കാഴ്ചയും കേള്‍വിയും കുറവുള്ള ഇവര്‍ മകന്‍ ശിവപ്പയ്‌ക്കൊപ്പമാണ് താമസം.
കഴിഞ്ഞ ജൂലൈയില്‍ മയ്യളയിലെ ലീലാവതിയും മകന്‍ രവിയും ശിവപ്പയുടെ വീട്ടിലെത്തി ശേഷമ്മക്കു നല്ല ചികിത്സ നല്‍കാനെന്നു പറഞ്ഞു അവരുടെ വീട്ടിലേക്കു വിളിച്ചുകൊണ്ടു പോവുകയായിരുന്നു. അവിടെ എത്തിയ ശേഷം മുള്ളേരിയയിലെ ഭൂപണയ ബാങ്കില്‍ നിന്നു വായ്പയെടുക്കാന്‍ ജാമ്യം നില്‍ക്കണമെന്നു പറയുകയും ചെയ്യുകയായിരുന്നു. പിന്നീടാണു അതു തന്റെ ഭൂമി വാങ്ങിയെന്ന കൃത്രിമ രേഖയുണ്ടാക്കാനാണെന്നു മനസിലായതെന്നു ഇവര്‍ പറഞ്ഞു. വ്യാജമായി ഉണ്ടാക്കിയ ആധാരം റദ്ദാക്കണമെന്ന് ഇവര്‍ നല്‍കിയ പരാതിയില്‍ ആവശ്യപ്പെട്ടു.