കൊച്ചി: ഒരു മാസത്തിലേറെയായി നടപ്പിലാക്കി വരുന്ന മീസില്‍സ് റൂബെല്ല പ്രതിരോധ ദൗത്യത്തില്‍ ജില്ലയില്‍ ഇതുവരെ 5,58,060 കുട്ടികള്‍ക്ക് പ്രതിരോധ കുത്തിവെപ്പ് നല്‍കി. ദൗത്യം 18ന് അവസാനിക്കും. വിദ്യാഭ്യാസ വകുപ്പിന്റെ സഹായത്തോടെ ആദ്യ ഘട്ടത്തില്‍ തന്നെ സ്‌കൂളുകളില്‍ പ്രത്യേക അധ്യാപക രക്ഷാകര്‍തൃയോഗങ്ങള്‍ സംഘടിപ്പിച്ച് ക്യാമ്പയിനിനെക്കുറിച്ച് ബോധവല്‍ക്കരണം നടത്തിയതാണ് ഇത്രയും നേട്ടം കൈവരിക്കുന്നതിന് സഹായിച്ചത്. പ്രതിരോധ കുത്തിവെപ്പെടുക്കാത്ത കുട്ടികള്‍ അധികമുള്ള സ്‌കൂളുകളിലെ ഹെഡ്മാസ്റ്റര്‍മാരെയും, മാനേജര്‍മാരെയും, പി.ടി.എ പ്രസിഡന്റുമാരെയും പങ്കെടുപ്പിച്ചുകൊണ്ടുള്ള അടിയന്തിര അവലോകന യോഗം ഇന്ന് ഉച്ചക്ക് 12 മണിക്ക് കലക്ടറുടെ അധ്യക്ഷതയില്‍ കാക്കനാട് കലക്ടറേറ്റ് കോണ്‍ഫറന്‍സ് ഹാളില്‍ വെച്ച് ചേരും.