കൊണ്ടോട്ടി: കരിപ്പൂരില്‍ എയര്‍ ഇന്ത്യ എക്‌സ്പ്രസ് വിമാനത്തിന്റെ സീറ്റിനടിയില്‍നിന്ന് 933 ഗ്രാം സ്വര്‍ണം കണ്ടെത്തി. ഇന്നലെ രാവിലെ അബൂദബിയില്‍ നിന്നെത്തിയ എയര്‍ഇന്ത്യ എക്‌സ്പ്രസ് വിമാനത്തിന്റെ സീറ്റിനടിയില്‍ നിന്നാണ് ഡി.ആര്‍.ഐ സംഘം സ്വര്‍ണം കണ്ടെത്തിയത്.
രഹസ്യ വിവരത്തെതുടര്‍ന്ന് കോഴിക്കോട് നിന്നെത്തിയ ഡി.ആര്‍.ഐ ഉദ്യോഗസ്ഥര്‍ വിമാനത്തിന്റെ സീറ്റുകള്‍ പരിശോധിച്ചപ്പോഴാണ് സ്വര്‍ണം കണ്ടെത്തിയത്. 116 ഗ്രാം വീതമുള്ള എട്ട് സ്വര്‍ണ ബിസ്‌ക്കറ്റുകളാണ് പിടിച്ചെടുത്തത്. പിടികൂടിയ സ്വര്‍ണത്തിന് 30 ലക്ഷം രൂപ വില ലഭിക്കും.
ശുചീകരണ തൊഴിലാളികളെ പ്രയോജനപ്പെടുത്തി സ്വര്‍ണം പുറത്ത് കടത്താനുള്ള ശ്രമമാണെന്ന് കരുതുന്നു. സ്വര്‍ണം കൊണ്ടുവന്ന യാത്രക്കാരനെ കണ്ടെത്താനായിട്ടില്ല. സ്വര്‍ണം ഒളിപ്പിച്ച വിമാന സീറ്റില്‍ യാത്ര ചെയ്ത ആളെ കേന്ദ്രീകരിച്ചാണ് അന്വേഷണം.