വടകര: കോ-ഓപ്പറേറ്റീവ് ആര്‍ട്‌സ് ആന്‍ഡ് സയന്‍സ് കോളജില്‍ വിദ്യാര്‍ഥി സംഘര്‍ഷം. ഇന്നലെയാണ് കോളജിലെ കെ.എസ്.യു-എ.ഐ.എസ്.എഫ് വിദ്യാര്‍ഥികള്‍ക്ക് മര്‍ദനമേറ്റത്. സംഭവത്തിനു പിന്നില്‍ എസ്.എഫ്.ഐ പ്രവര്‍ത്തകരാണെന്നാണ് ആരോപണം. സംഘര്‍ഷത്തില്‍ എ.ഐ.എസ്.എഫ് ജില്ലാ ഭാരവാഹി ദര്‍ഷിത്, കെ.എസ്.യു പ്രവര്‍ത്തകരായ പി. വിഷ്ണു, ആര്‍. അനൂപ്, അജ്മല്‍ അഷ്‌റഫ്, എസ്.എഫ്.ഐ പ്രവര്‍ത്തകനായ അഖില്‍ എന്നിവര്‍ക്ക് പരുക്കേറ്റു. പരുക്കേറ്റവരെ വടകര ജില്ലാ ആശുപത്രിയില്‍ പ്രവേശിപ്പിച്ചു. അതേസമയം പ്രശ്‌നങ്ങളൊന്നുമില്ലാത്ത കാംപസില്‍ എസ്.എഫ്.ഐ പ്രവര്‍ത്തകര്‍ മനഃപൂര്‍വം പ്രശ്‌നങ്ങളുണ്ടാക്കുകയായിരുന്നുവെന്ന് കെ.എസ്.യു നേതാക്കള്‍ കുറ്റപ്പെടുത്തി. മറ്റ് സംഘടനകള്‍ക്ക് പ്രവര്‍ത്തന സ്വാതന്ത്ര്യം നിഷേധിക്കുന്ന എസ്.എഫ്.ഐ നിലപാടിനെതിരേ ഇന്ന് വടകര ബ്ലോക്കിലെ വിദ്യാലയങ്ങളില്‍ കെ.എസ്.യു കരിദിനമാചരിക്കുമെന്നും നേതാക്കള്‍ വ്യക്തമാക്കി.