കൊട്ടിയൂര്‍: പാല്‍ചുരം ചെകുത്താന്‍തോടിനു സമീപത്തെ തോട്ടില്‍ കോഴിയുടെ അവശിഷ്ടങ്ങള്‍ തള്ളി. ഇരുപതോളം ചാക്കുകളിലായി നിറച്ച അവശിഷ്ടങ്ങളാണ് ബാവലി പുഴയുടെ ഉത്ഭവസ്ഥാനമായ തോട്ടില്‍ തള്ളിയിരിക്കുന്നത്.
പഴശ്ശി ജലസംഭരണപദ്ധതിലേക്കുള്ള പ്രധാന ജലസ്രോതസുകളിലൊന്നായ ബാവലി പുഴയില്‍ മാലിന്യം തള്ളിയതോടെ കണ്ണൂര്‍, തലശ്ശേരി ഭാഗങ്ങളിലെ നിരവധി പേരുടെ കുടിവെള്ളമാണ് മലിനമായിരിക്കുന്നത്.
ദുര്‍ഗന്ധം മൂലം സമീപ പ്രദേശത്ത് താമസിക്കുന്നവര്‍ക്ക് ഭക്ഷണം കഴിക്കാന്‍ പോലും കഴിയാത്ത അവസ്ഥയാണെന്നും പ്രദേശവാസികള്‍ പറയുന്നു. മാലിന്യം തള്ളുന്നതുമൂലം വാഹനയാത്രക്കാരും ഏറെ ദുരിതമാണ് അനുഭവിക്കുന്നത്. പ്രദേശത്ത് സി.സി ടി.വി ഉള്‍പ്പെടെയുള്ള സൗകര്യങ്ങള്‍ ഏര്‍പ്പെടുത്തണമെന്നാണ് നാട്ടുകാര്‍ ആവശ്യപ്പെടുന്നത്.