പയ്യാവൂര്‍: തലശേരി അതിരൂപതയിലെ പ്രമുഖ വൈദീകരിലൊരാളും ചെമ്പേരി വിമല്‍ ജ്യോതി എന്‍ജിനിയറിങ് കോളജ് ചെയര്‍മാനും പൂപ്പറമ്പ് സെന്റ് ഫുസ്‌കോ ദേവാലയ വികാരിയുമായ റവ. ഡോ. തോമസ് മേല്‍വെട്ടം പൗരോഹത്യത്തിന്റെ രജത ജൂബിലി ആഘോഷിക്കുന്നു. 1992 ഡിസംബര്‍ 29ന് അന്നത്തെ രൂപതാധ്യക്ഷന്‍ ആര്‍ച്ച് ബിഷപ്പ് (എമിരറ്റസ്) മാര്‍. ജോര്‍ജ് വലിയ മറ്റത്തില്‍ നിന്ന് ഇടവക ദൈവാലയമായ ചുണ്ടപ്പറമ്പ് സെന്റ് ആന്റണീസ് പള്ളിയില്‍ നടന്ന തിരുകര്‍മത്തിലാണ് പൗരോഹത്യ പട്ടം സ്വീകരിച്ചത്. ഇന്ന് രാവിലെ പത്തിന് ചുണ്ടപ്പറമ്പ് സെന്റ് ആന്റണീസ് ദേവാലയത്തില്‍ രജത ജൂബിലി ആഘോഷം തലശേരി അതിരൂപത ആര്‍ച്ച് ബിഷപ്പ് മാര്‍. ജോര്‍ജ് ഞരളക്കാട്ട് ഉദ്ഘാടനം ചെയ്യും. ആര്‍ച്ച് ബിഷപ്പിന്റെ മുഖ്യകാര്‍മികത്വത്തില്‍ സമൂഹബലിയര്‍പ്പിക്കും. തുടര്‍ന്ന് അനുമോദന യോഗവും നടത്തും.