കിളിമാനൂര്‍: ഗവ.യു.പി.എസ് വഞ്ചിയൂരിലെ നല്ല വായന, നല്ല പഠനം, നല്ല ജീവിതം പരിപാടിയുടെ ഭാഗമായി പുസ്തക സമാഹരണം നടക്കുന്നു .
മുന്‍ വര്‍ഷങ്ങളിലെ പോലെ ഈ വര്‍ഷവും നിരവധി പുസ്തകങ്ങള്‍, ആനുകാലിക പ്രസിദ്ധീകരണങ്ങള്‍ എന്നിവ സ്‌കൂളിലേക്ക് സംഭാവനയായി ലഭിച്ചു കഴിഞ്ഞു. പൂര്‍വ വിദ്യാര്‍ഥികള്‍, നാട്ടുകാര്‍, രക്ഷിതാക്കള്‍ തുടങ്ങി നിരവധി ആളുകള്‍ ഈ പരിപാടിയുടെ ഭാഗമായ പുസ്തകക്കൂടയിലേക്ക് പുസ്തകങ്ങള്‍ നിക്ഷേപിക്കുന്നുണ്ട്. വായനയെ പരിപോഷിപ്പിക്കുന്നതിനായുള്ള വ്യത്യസ്ത പരിപാടികളുടെ തുടര്‍ച്ചയാണ് പുസ്തക ശേഖരണം.
ഓരോ കുട്ടികള്‍ക്കും ഇഷ്ട മേഖലയിലെ പുസ്തകങ്ങള്‍ തിരഞ്ഞെടുത്ത് വായിച്ച് വരുംദിവസങ്ങളില്‍ പുസ്തകങ്ങളെക്കുറിച്ച് അവലോകനം നടത്താന്‍ വിദ്യാരംഗം കണ്‍വീനര്‍ കുട്ടികളെ സഹായിക്കുന്നുണ്ട്. എല്ലാ അസംബ്ലിയിലും പുസ്തക പരിചയവും വായനാ കുറിപ്പുകളുടെ അവതരണവും നടന്നു വരുന്നുവെന്നതും പ്രത്യേകതയാണ്.
ആയിരക്കണക്കിന് പുസ്തകങ്ങള്‍ സ്‌കൂള്‍ ലൈബ്രറിയിലേക്ക് സ്വന്തമായി എന്നതാണ് പുസ്തകക്കൂടയിലൂടെ വഞ്ചിയൂര്‍ സ്‌കൂളിന് ലഭിച്ച നേട്ടം.