തൃശൂര്‍: സ്വകാര്യ ബസ് ജീവനക്കാര്‍ക്ക് മര്‍ദനമേറ്റതില്‍ പ്രതിഷേധിച്ച് തൃശൂര്‍ കുറ്റിപ്പുറം കോഴിക്കോട് റൂട്ടില്‍ സ്വകാര്യ ബസുകള്‍ പണിമുടക്കുന്നു. വളയംകുളത്തു വച്ച് അപ്പൂസ് എന്ന സ്വകാര്യ ബസിലെ ജീവനക്കാര്‍ ആക്രമിക്കപ്പെട്ടതിനെ തുടര്‍ന്നുള്ള പ്രതിഷേധമായാണ് പണിമുടക്കുന്നത്. ആക്രമണത്തില്‍ ഡ്രൈവര്‍ ബിജു (38), കണ്ടക്ടര്‍ ദിലീപ് (36) എന്നിവര്‍ക്കാണ് പരുക്കേറ്റത്. ബിജുവിന്റെ ഇടതു കൈ ഒടിഞ്ഞിട്ടുണ്ട്. പരുക്കേറ്റ ഇരുവരും സ്വകാര്യ ആശുപത്രിയില്‍ ചികിത്സ തേടി. വളയംകുളത്തു വച്ച് മൂന്നംഗ സംഘമാണ് ബസിനുനേരെ ആക്രമണം അഴിച്ചുവിട്ടത്.
രണ്ടാഴ്ച മുന്‍പ് ചങ്ങരംകുളത്ത് വച്ച് പെട്രോള്‍ പമ്പുടമയുടെ മകന്‍ പമ്പിനു മുന്നില്‍ വച്ച് ബൈക്കില്‍ സ്വകാര്യ ബസിടിച്ചുണ്ടായ അപകടത്തില്‍ മരിച്ചിരുന്നു. ഇതിനെതുടര്‍ന്നുള്ള പ്രതികാരമായാണ് ആക്രമണം നടന്നതെന്നാണ് സൂചന. ഇന്നലെ മര്‍ദനമേറ്റ ജീവനക്കാര്‍ ഓടിച്ചിരുന്ന ബസിടിച്ചായിരുന്നു യുവാവ് മരിച്ചത്. ബസ് ജീവനക്കാരെ ആക്രമിച്ച വിവരമറിഞ്ഞ് തൃശൂര്‍ ശക്തന്‍ സ്റ്റാന്‍ഡില്‍ നിന്ന് ഈ റൂട്ടിലുള്ള ബസ് ജീവനക്കാര്‍ രണ്ട് ബസുകളിലായി എത്തി ചങ്ങരംകുളം പൊലിസ് സ്റ്റേഷനിലേക്കു മാര്‍ച്ച് നടത്തുകയും ചെയ്തിരുന്നു.  ഇന്ന് ഇതുമായി ബന്ധപ്പെട്ട് നടക്കുന്ന ചര്‍ച്ചകളില്‍ തീരുമാനമായില്ലെങ്കില്‍ അനിശ്ചിതകാല സമരം ഉള്‍പ്പെടെയുള്ള നടപടികളെടുക്കാനാണ് തീരുമാനം.