കൊച്ചി: ഐ.എസ്.എല്‍ മത്സരങ്ങള്‍ക്ക് തുടക്കം കുറിച്ച് കലൂര്‍ രാജ്യാന്തര സ്റ്റേഡിയത്തില്‍ നടക്കുന്ന കേരള ബ്ലാസ്റ്റേഴ്‌സ്- കൊല്‍ക്കത്ത മത്സരം കാണാന്‍ കൗണ്ടറിലൂടെ ടിക്കറ്റ് നല്‍കാത്തതില്‍ ആരാധകരുടെ പ്രതിഷേധം. സ്റ്റേഡിയത്തിനു മുന്നിലെ ടിക്കറ്റ് കൗണ്ടര്‍ ഇവര്‍ തകര്‍ത്തു. രാവിലെ മുതല്‍ ടിക്കറ്റിനായി കാത്തുനില്‍ന്നവരാണ് ഒടുവില്‍ പ്രകോപിതരായത്.

ഐ.എസ്.എല്‍ ഉദ്ഘാടന മത്സരത്തിനു സ്റ്റേഡിയത്തില്‍ ടിക്കറ്റ് വില്‍പനയില്ലെന്ന് അധികൃതര്‍ നേരത്തെ അറിയിച്ചിരുന്നു. ഇതറിയാതെ എത്തിയവരാണ് സ്റ്റേഡിയത്തിനു പുറത്ത് തടിച്ചുകൂടിയവരില്‍ അധികവും. ടിക്കറ്റ് കൗണ്ടറുകള്‍ തുറക്കുന്നതല്ലെന്നു ബ്ലാസ്റ്റേഴ്‌സ് അധികൃതര്‍ അറിയിച്ചു.