കൊച്ചി: പെരിയാറിലെ രാസ മലിനീകരണത്തിനെതിരേ ബൈക്കില്‍ ബോധവത്ക്കരണ റാലി നടത്തിയ പരിസ്ഥിതി പ്രവര്‍ത്തകര്‍ക്ക് നേരെ പൊലിസിന്റെ അതിക്രമമെന്ന് ആക്ഷേപം. പ്രകടനത്തിനിടെ കളക്ടീവ് ഫോര്‍ റൈറ്റ് ടു ലീവ് എന്ന സംഘടനയുടെ പ്രവര്‍ത്തകരും വൈപ്പിന്‍ സ്വദേശികളുമായ പ്രവീണ്‍ സോണി സോസ, ഷംസുദ്ദീന്‍ എന്നിവരെ ഞാറക്കല്‍ പൊലിസ് അറസ്റ്റ് ചെയ്തു. പ്രവര്‍ത്തകര്‍ പൊലിസ് സ്റ്റേഷനില്‍ പ്രതിഷേധിച്ചതിനെ തുടര്‍ന്ന് രണ്ടു പേരെയും പിന്നീട് ജാമ്യത്തില്‍ വിട്ടു.
ഇന്നലെ ഉച്ചയോടെയാണ് സംഭവം. ജില്ലയുടെ പ്രധാന കുടിവെള്ള സ്രോതസായ പെരിയാറിലെ രാസമലീനീകരണത്തെ സംബന്ധിച്ച് പുഴ ഒഴുകട്ടെ സ്വതന്ത്രമായി എന്ന മുദ്രാവാക്യമുയര്‍ത്തി ഇന്ന്  100 കേന്ദ്രങ്ങളില്‍ നടത്തുന്ന പരിപാടിയുടെ പ്രചരണത്തിന്റെ ഭാഗമായാണ് മുനമ്പം മുതല്‍ പുതുവൈപ്പ് വരെ സംഘാടകര്‍ ബോധവത്ക്കരണ റാലി സംഘടിപ്പിച്ചത്.
സ്ഥലം എം.എല്‍.എയായ എസ് ശര്‍മ്മയെ സംഘാടകര്‍ ഉദ്ഘാടനകനായി  ക്ഷണിച്ചിരുന്നെങ്കിലും തിരക്ക് കാരണം പറഞ്ഞ് ഇദ്ദേഹം പരിപാടിയില്‍ പങ്കെടുത്തില്ല.  അറുപതോളം ബൈക്കുകളുടെ അകമ്പടിയോടെ സമാധാനപരമായി മുന്നേറുകയായിരുന്ന റാലി നായരമ്പലത്ത് വെച്ച് പൊലിസ് തടയുകയായിരുന്നു. തുടര്‍ന്ന് സോണിയെയും ഷാനവാസിനെയും ബലമായി അറസ്റ്റ് ചെയ്ത് ജീപ്പില്‍ കയറ്റി. കുടിവെള്ളത്തില്‍ വിഷം കലര്‍ന്നിട്ടുണ്ടെന്ന് സാമൂഹ്യ മാധ്യമങ്ങള്‍  വഴി പ്രചരണം നടത്തി നാട്ടുകാരെ ഭീതിയിലാഴ്ത്തി എന്നാരോപിച്ചായിരുന്നു അറസ്റ്റ്.
 തുടര്‍ന്ന് സ്റ്റേഷനിലെത്തിയ സഹ പ്രവര്‍ത്തകര്‍ അറസ്റ്റ് ചെയ്തവരെ വിട്ടു കിട്ടണമെന്നാവശ്യപ്പെട്ട് പ്രതിഷേധം തുടങ്ങിയതോടെ പൊലിസ് അയഞ്ഞു. വൈകിട്ടോടെ ഇരുവരെയും ജാമ്യത്തില്‍ വിടുകയായിരുന്നു. കുടിവെള്ള വിഷം കലര്‍ത്തിയെന്ന പ്രചരണം നടത്തിയതിനാണ് അറസ്റ്റ് ചെയ്തതെന്ന് ആദ്യം പറഞ്ഞ പൊലിസ് പിന്നീട് നിലപാട് മാറ്റിയെന്ന് സമരക്കാര്‍ പറഞ്ഞു.
സ്റ്റേഷനിലെത്തിയപ്പോള്‍ അനുമതിയില്ലാതെ മൈക്ക് ഉപയോഗിച്ചതിനാണ് അറസ്റ്റ് ചെയ്തതെന്നായിരുന്നു പൊലിസ് ഭാഷ്യം. എന്നാല്‍ മൈക്ക് അനുമതിക്ക് മൂന്നു ദിവസം മുമ്പ് തന്നെ അപേക്ഷ കൊടുത്തിരുന്നതായും ഉപയോഗത്തിന് പൊലിസ് വാക്കാല്‍ അനുമതി നല്‍കിയിരുന്നതായും സംഘടന പ്രവര്‍ത്തകര്‍ പറഞ്ഞു.
പെരിയാറിലെ രാസമലിനീകരണണത്തിനെതിരെ മാസങ്ങളായി സോഷ്യല്‍ മീഡിയ വഴി വിവിധ സംഘടനകള്‍ കാമ്പയിന്‍ നടത്തുന്നുണ്ടെന്നും അറസ്റ്റിന് പിന്നില്‍ രാസവള കമ്പനികളുടെ സ്വാധീനമാണെന്നും സമരക്കാര്‍ ആരോപിച്ചു. മോശം പെരുമാറ്റമാണ് തങ്ങള്‍ക്ക് നേരെ പൊലിസിന്റെ ഭാഗത്ത് നിന്നുണ്ടായതെന്നും അവര്‍ പറഞ്ഞു.