ജിദ്ദ: രാജ്യത്ത് ജോലി ചെയ്യുന്ന വിദേശജീവനക്കാര്‍ക്ക് വിരമിക്കല്‍ പ്രായം നിശ്ചയിക്കണമെന്ന ആവശ്യവുമായി സഊദിയില്‍ സോഷ്യല്‍ മീഡിയ കാംപയിന്‍ വ്യാപകമാകുന്നു. 60 വയസ് പ്രായം കഴിഞ്ഞവരെ ജോലിയില്‍ നിന്നും ഒഴിവാക്കണമെന്നാണ് കാംപയിന്റെ ആവശ്യം. സ്വദേശികളില്‍ ചിലര്‍ ആരംഭിച്ച കാംപയിന്‍ കൂടുതല്‍ പേര്‍ ഏറ്റെടുത്തു. തുടര്‍ന്ന് ഫെയ്‌സ്ബുക്ക്, ട്വിറ്റര്‍ തുടങ്ങിയ എല്ലാ സാമൂഹ്യമാധ്യമങ്ങളിലും കാംപയിന്‍ സജീവമായി.

സഊദിയില്‍ ഏകദേശം മൂന്ന് ലക്ഷത്തിലധികം വിദേശികള്‍ 60 വയസു കഴിഞ്ഞിട്ടും ജോലി ചെയ്യുന്നുണ്ടെന്നാണ് കണക്കാക്കപ്പെടുന്നത്. ഇതു സംബന്ധിച്ച കണക്കുകള്‍ ചില അറബ് മാധ്യമങ്ങളും പുറത്തുവിട്ടിരുന്നു. 60 വയസ് പിന്നിട്ടവര്‍ ജോലിയില്‍ തുടര്‍ന്നാല്‍ സ്ഥാപനങ്ങള്‍ക്ക് വലിയ ലാഭം നേടാന്‍ ആവില്ലെന്നും കാംപയിനില്‍ പറയുന്നു. ഇത്തരക്കാര്‍ ജോലിയില്‍ തുടരുന്നതുമൂലം ചെറുപ്രായക്കാരായ സ്വദേശികള്‍ക്ക് അവസരം നഷ്ടപ്പെടുന്നുണ്ടെന്നും കാംപയിനില്‍ വ്യക്തമാക്കുന്നുണ്ട്. വിരമിക്കല്‍ പ്രായം നിശ്ചയിക്കണമെന്ന ആവശ്യത്തിനു പുറമെ, വിദേശികളുടെ ഇഖാമ കാലാവധി 6 വര്‍ഷമായി നിചപ്പെടുത്തണമെന്ന ആവശ്യവും കാംപയിനില്‍ ഉന്നയിക്കുന്നു. കൂടാതെ മൂന്നു തവണയിലധികം ഇഖാമ പുതുക്കി നല്‍കരുതെന്ന ആവശ്യവും കാംപയിനില്‍ ശക്തമാണ്.