കണ്ണൂര്‍: 25 വര്‍ഷം പിന്നിട്ട ഉദാരവല്‍ക്കരണ പ്രക്രിയ രാജ്യത്തെ സാമ്പത്തിക പ്രവര്‍ത്തനത്തിന്റെ എല്ലാ മേഖലകളെയും സ്വകാര്യവല്‍ക്കരിക്കുന്നതിലേക്കാണ് നയിച്ചതെന്ന് സി.പി.എം പൊളിറ്റ് ബ്യൂറോ അംഗം പ്രകാശ് കാരാട്ട്.
വികസിത മുതലാളിത്ത രാജ്യങ്ങളിലടക്കം നവ ഉദാരവല്‍ക്കരണം കടുത്ത പ്രതിസന്ധി നേരിടുമ്പോഴാണ് ഇവിടെ മോദി സര്‍ക്കാര്‍ തീവ്രമായി നടപ്പാക്കുന്നത്. പൊതുമേഖലാ സ്ഥാപനങ്ങള്‍ സ്വകാര്യവല്‍ക്കരിക്കുന്നതിനെതിരേ കണ്ണൂര്‍ ജില്ലാ ലൈബ്രറി കൗണ്‍സിലും ട്രേഡ് യൂണിയന്‍ ഐക്യവേദിയും നടത്തിയ ദേശീയ സെമിനാര്‍ ഉദ്ഘാടനം ചെയ്യുകയായിരുന്നു കാരാട്ട്.
പൊതുസമ്പത്ത് സൗജന്യമായോ തുച്ഛവിലയ്‌ക്കോ സ്വകാര്യമേഖലക്ക് കൈമാറ്റം ചെയ്യപ്പെട്ടു. മാര്‍ക്‌സ് പറഞ്ഞതു പോലെ പ്രാകൃതനിലയിലുള്ള മൂലധന കേന്ദ്രീകരണമാണിത്.
കൃഷിയും വ്യവസായവുമടക്കമുള്ള ഉല്‍പ്പാദന മേഖലകള്‍ക്കൊപ്പം വിദ്യാഭ്യാസം, ആരോഗ്യസംവിധാനം, പൊതുവിതരണം, ഗതാഗതം തുടങ്ങിയ അടിസ്ഥാന സര്‍വീസ് മേഖലകളും തകര്‍ക്കപ്പെട്ടു. സാമ്പത്തിക മേഖല പൂര്‍ണമായും മൂലധനശക്തികള്‍ക്കും വന്‍കിട കോര്‍പറേറ്റുകള്‍ക്കും തുറന്നുകൊടുത്തെന്നും കാരാട്ട് പറഞ്ഞു.