ചോദ്യങ്ങളെ ഭയം; വാര്‍ത്താസമ്മേളനം വിളിക്കാത്ത ആദ്യ പ്രധാനമന്ത്രി: മോദിക്കെതിരേ കപില്‍ സിബല്‍

വഡോദര: പ്രധാനമന്ത്രി നരേന്ദ്രമോദിയെ രൂക്ഷമായി വിമര്‍ശിച്ച് കോണ്‍ഗ്രസ് നേതാവും പ്രമുഖ അഭിഭാഷകനുമായ കപില്‍ സിബല്‍. വാര്‍ത്താസമ്മേളനം വിളിക്കാത്ത ആദ്യ പ്രധാനമന്ത്രിയാണ് മോദിയെന്നും അദ്ദേഹത്തിനു ചോദ്യങ്ങളെ ഭയമാണെന്നും വഡോദരയില്‍ നടന്ന ഒരു പരിപാടിയില്‍ സംസാരിക്കവേ അദ്ദേഹം പറഞ്ഞു.
ഗുജറാത്തിലെ അഭിഭാഷകരും ബിസിനസുകാരും അടക്കമുള്ള സദസിനോടു സംസാരിക്കവേയാണ് കടുത്ത വിമര്‍ശനങ്ങളുമായി കപില്‍ സിബല്‍ രംഗത്തെത്തിയത്. യാഥാര്‍ഥ്യത്തിനു നിരക്കാത്തതും അസംഭവ്യവുമായ കാര്യങ്ങള്‍ പ്രസംഗിക്കുകയാണ് മോദിയുടെ തൊഴിലെന്നു പറഞ്ഞ അദ്ദേഹം, ഏതെങ്കിലും ഒരു മേഖലയില്‍ ഗുജരാത്ത് മുന്നില്‍നില്‍ക്കുന്നതായി തെളിയിക്കാന്‍ ബി.ജെ.പി അധ്യക്ഷന്‍ അമിത് ഷായെ വെല്ലുവിളിക്കുകയും ചെയ്തു.
ഗുജറാത്ത് ഒരു മേഖലയിലും മുന്നിലെത്തിയിട്ടില്ല. അക്കാര്യങ്ങള്‍ സംസാരിക്കുന്നിത് അമിത് ഷായുമായി സംവാദത്തിനു തയാറാണ്. ഒരു സംസ്ഥാനത്തു തെരഞ്ഞെടുപ്പ് നടക്കുന്നു എന്ന കാരണത്താല്‍ പാര്‍ലമെന്റിന്റെ ശീതകാല സമ്മേളനം നീട്ടിവയ്ക്കുന്നതിനെയും അദ്ദേഹം വിമര്‍ശിച്ചു.
മുന്‍ പ്രധാനമന്ത്രി ഡോ. മന്‍മോഹന്‍ സിങ്ങിനെ ഊമയെന്നു കളിയാക്കിവരെയും സിബല്‍ വിമര്‍ശിച്ചു. പാര്‍ലമെന്റില്‍ കാര്യങ്ങള്‍ കൃത്യമായി വിശദീകരിച്ചിരുന്ന മന്‍മോഹനും ചോദ്യങ്ങളെ ഭയക്കുന്ന മോദിയും തമ്മില്‍ താരതമ്യംപോലുമില്ലെന്നായിരുന്നു അദ്ദേഹം പറഞ്ഞത്.
അടുത്ത മാസം നടക്കുന്ന ഗുജറാത്ത് നിയമസഭാ തെരഞ്ഞെടുപ്പ് പ്രചാരണത്തില്‍ കോണ്‍ഗ്രസ് മുന്നേറുകയാണ്. പാര്‍ട്ടി ഉപാധ്യക്ഷന്‍ രാഹുല്‍ ഗാന്ധി സംസ്ഥാനത്തു നടത്തിയ പ്രചാരണം ബി.ജെ.പിയെയും അസ്വസ്ഥമാക്കുന്നുണ്ട്.
നോട്ടുനിരോധനവും ജി.എസ്.ടിയുമായിരുന്നു ഇതുവരെ കോണ്‍ഗ്രസിന്റെ മുഖ്യ പ്രചാരണ വിഷയങ്ങളെങ്കില്‍, റാഫേല്‍ യുദ്ധവിമാനങ്ങള്‍ വാങ്ങിയതില്‍ വന്‍ സാമ്പത്തിക ക്രമക്കേട് നടന്നെന്ന ആരോപണവും കോണ്‍ഗ്രസ് ഇപ്പോള്‍ ഉയര്‍ത്തുന്നുണ്ട്.