നിലമ്പൂര്‍: നാടുകാണി മഖാം തകര്‍ത്ത കേസില്‍ കൂടുതല്‍ പ്രതികളുണ്ടെന്ന് പൊലിസിന് സൂചന ലഭിച്ചതായി വിവരം. മുജാഹിദിലെ തീവ്ര വിഭാഗമായ വിസ്ഡം പ്രവര്‍ത്തകരാണ് പ്രതികളെന്നാണ് പൊലിസിന്റെ കണ്ടെത്തല്‍. സംഭവത്തില്‍ അറസ്റ്റിലായ വഴിക്കടവ് ആനമറി മുളയങ്കായി അനീഷിനെ കോടതി റിമാന്‍ഡ് ചെയ്തു.
അതേസമയം, കേസിലെ ഒന്നാം പ്രതിയായ മാമാങ്കര അത്തിമണ്ണില്‍ ഷാജഹാനെ വിദേശത്ത്‌നിന്ന് നാട്ടിലേക്ക് എത്തിക്കാനുള്ള ശ്രമവും പൊലിസ് ആരംഭിച്ചിട്ടുണ്ട്. ഇയാള്‍ക്കെതിരേ അടുത്ത ദിവസം ലുക്കൗട്ട് നോട്ടിസ് പുറത്തിറക്കും. ഇയാളെ നാട്ടിലെത്തിക്കുന്നതിന് ഇന്ത്യന്‍ എംബസിയുമായി പൊലിസ് ബന്ധപ്പെട്ടിട്ടുണ്ട്. അവസാനം മഖാം തകര്‍ത്തതിനുശേഷം പുതുക്കിപ്പണിതപ്പോഴും തകര്‍ക്കാന്‍ പദ്ധതിയിട്ടിരുന്നു. പൊലിസ് കാവല്‍ ശക്തമായതോടെയാണ് ശ്രമം ഉപേക്ഷിച്ച് ഷാജഹാന്‍ വിദേശത്തേക്ക് കടന്നത്. നിര്‍ധന കുടുംബാംഗമായ ഷാജഹാന് വിസയ്ക്ക് അരലക്ഷം രൂപയും മറ്റു സാമ്പത്തിക സഹായവും നല്‍കിയവരെ കുറിച്ചും പൊലിസിന് വിവരം ലഭിച്ചിട്ടുണ്ട്.
ഷാജഹാന്‍ വിദേശത്ത് പോകുന്നത് മാതാവോ ബന്ധുക്കളോ പോലും അറിഞ്ഞിരുന്നില്ല. ഇതുവരേയും വീട്ടിലേക്കോ ബന്ധുക്കളേയോ ഫോണ്‍ വിളിച്ചിട്ടില്ലെന്നാണ് വീട്ടുകാര്‍ മൊഴി നല്‍കിയത്. ഏറ്റവും അടുത്ത ചിലരോട് മാത്രം പറഞ്ഞാണ് വിദേശത്തേക്ക് കടന്നത്. പ്രതികളുടെ വീടുകളില്‍ പൊലിസ് പരിശോധന നടത്തി. ഷാജഹാന്റെ പാസ്‌പോര്‍ട്ടിന്റെ പകര്‍പ്പ്, മറ്റു രേഖകള്‍ എന്നിവ പൊലിസ് കസ്റ്റഡിയിലെടുത്തു. ജാറം പൊളിച്ച് താന്‍ ശഹീദാവാനാണ് ശ്രമിക്കുന്നതെന്ന് ഷാജഹാന്‍ പറഞ്ഞിരുന്നതായും പൊലിസിന് വിവരം ലഭിച്ചു.
നേരത്തെ വിദേശത്തായിരുന്ന ഷാജഹാന്‍ ഓഗസ്റ്റിലാണ് നാട്ടിലെത്തിയത്. സെപ്റ്റംബറിലാണ് ജാറം തകര്‍ത്തത്.