മലപ്പുറം: കുവൈത്തില്‍ വധശിക്ഷക്ക് വിധിക്കപ്പെട്ട തമിഴ്‌നാട് സ്വദേശിയുടെ ഭാര്യയും കുടുംബവും സഹായം തേടി പാണക്കാട്ടെത്തി. തമിഴ്‌നാട്ടിലെ തഞ്ചാവൂര്‍ അത്തിവെട്ടി അര്‍ജുനന്‍ അത്തിമുത്തുവിന്റെ ഭാര്യ എ. മാലതിയും പിതാവ് ദുരൈ രാജുമാണ് ഇന്നലെ കൊടപ്പനക്കല്‍ തറവാട്ടിലെത്തി പാണക്കാട് സയ്യിദ് മുനവ്വറലി ശിഹാബ് തങ്ങളെ കണ്ട് സഹായമഭ്യര്‍ഥിച്ചത്. മലപ്പുറം സ്വദേശി കൊല്ലപ്പെട്ട കേസിലാണ് അര്‍ജുനനെ വധശിക്ഷക്ക് വിധിച്ചിട്ടുള്ളത്. കുവൈത്തിലെ ജലീബില്‍ ഒരേ സ്ഥാപനത്തില്‍ ജോലി ചെയ്യുന്ന ഇരുവരും തമ്മിലുണ്ടായ വാക്ക് തര്‍ക്കമാണ് കൊലപാതകത്തില്‍ കലാശിച്ചത്. നാലുവര്‍ഷം മുന്‍പാണ് സംഭവം. അര്‍ജുനനെ പൊലിസ് പിടികൂടി വിചാരണക്ക് ശേഷം തൂക്കിലേറ്റാന്‍ വിധിക്കുകയായിരുന്നു. കൊല്ലപ്പെട്ടയാളുടെ കുടുംബം മാപ്പുനല്‍കിയാല്‍ ശിക്ഷയില്‍ ഇളവനുവദിക്കും. കൊല്ലപ്പെട്ടയാളുടെ ബന്ധുക്കള്‍ നഷ്ടപരിഹാരമായി 30 ലക്ഷം രൂപയാണ് ആവശ്യപ്പെടുന്നത്. എന്നാല്‍ സ്വന്തമായുള്ളതെല്ലാം വിറ്റുകൂട്ടിയാലും ഈ തുക ലഭിക്കില്ലെന്നാണ് മാലതി പറയുന്നത്. കൂലിപ്പണിയെടുത്താണ് മാലതി കുടുംബം പോറ്റുന്നത്. പതിനൊന്ന് വയസായ മകളുണ്ട് മാലതിക്ക്.
വധശിക്ഷയില്‍ നിന്ന് ഭര്‍ത്താവിനെ രക്ഷിക്കാന്‍ സഹായിക്കണമെന്ന് മാലതിയും കുടുംബവും മുനവ്വറലി തങ്ങളോട് അഭ്യര്‍ഥിച്ചു. കേസുമായി ബന്ധപ്പെട്ട രേഖകള്‍ കുടുംബം തങ്ങള്‍ക്ക് കൈമാറി. കൊല്ലപ്പെട്ട മലപ്പുറം സ്വദേശിയുടെ ബന്ധുക്കളുമായി സംസാരിക്കാമെന്നും ആവശ്യമായ മറ്റു സഹായങ്ങളും തങ്ങള്‍ അവര്‍ക്ക് വാഗ്ദാനം ചെയ്തു.