ദുബൈ: അന്താരാഷ്ട്ര ക്രിക്കറ്റ് കൗണ്‍സിലിന്റെ ടെസ്റ്റ് റാങ്കിങില്‍ ഇന്ത്യന്‍ താരങ്ങള്‍ക്ക് മുന്നേറ്റം. ശ്രീലങ്കയ്‌ക്കെതിരായ ആദ്യ ക്രിക്കറ്റ് ടെസ്റ്റില്‍ തകര്‍പ്പന്‍ പ്രകടനമാണ് ഇന്ത്യക്ക് ഗുണകരമായത്. ക്യാപ്റ്റന്‍ വിരാട് കോഹ്‌ലി അഞ്ചാം റാങ്കിലേക്കാണ് മുന്നേറിയത്. ലങ്കയ്‌ക്കെതിരേ രണ്ടാമിന്നിങ്‌സില്‍ തകര്‍പ്പന്‍ സെഞ്ച്വറി നേടിയിരുന്നു കോഹ്‌ലി. ആസ്‌ത്രേലിയയുടെ ഡേവിഡ് വാര്‍ണറെ മറികടന്നാണ് കോഹ്‌ലി അഞ്ചാം സ്ഥാനത്തേക്ക് മുന്നേറിയത്. അന്താരാഷ്ട്ര ക്രിക്കറ്റില്‍ താരത്തിന്റെ 50ാം സെഞ്ച്വറിയായിരുന്നു ഇത്.
അതേസമയം ഓള്‍റൗണ്ടര്‍ രവീന്ദ്ര ജഡേജയ്ക്ക് ബൗളര്‍മാരുടെ റാങ്കിങില്‍ തിരിച്ചടി നേരിട്ടു. പുതിയ റാങ്കിങില്‍ മൂന്നാം സ്ഥാനത്താണ് താരം. ഇതോടെ ഒന്നാം സ്ഥാനത്ത് തിരിച്ചെത്താനുള്ള താരത്തിന്റെ ശ്രമത്തിന് തിരിച്ചടിയേറ്റു. ലങ്കയ്‌ക്കെതിരേ രണ്ട് ഓവറുകള്‍ മാത്രമാണ് ജഡേജയ്ക്ക് എറിയാനായത്. 20 റേറ്റിങ് പോയിന്റുകളാണ് താരത്തിന് നഷ്ടമായത്. പേസ് ബൗളര്‍ ഭുവനേശ്വര്‍ കുമാര്‍ എട്ടു സ്ഥാനം മെച്ചപ്പെടുത്തി 29ാം സ്ഥാനത്തേക്ക് മുന്നേറിയിട്ടുണ്ട്. കൊല്‍ക്കത്ത ടെസ്റ്റില്‍ എട്ടുവിക്കറ്റോടെ കളിയിലെ താരമാകാന്‍ താരത്തിന് സാധിച്ചിരുന്നു. മറ്റൊരു ബൗളര്‍ മുഹമ്മദ് ഷമി ഒരു സ്ഥാനം മെച്ചപ്പെടുത്തി 18ാം റാങ്കിലെത്തി. ലങ്കയ്‌ക്കെതിരേ രണ്ടിന്നിങ്‌സുകളിലുമായി ആറു വിക്കറ്റുകളാണ് താരം വീഴ്ത്തിയത്.