കുറവിലങ്ങാട്: മര്‍ത്ത്മറിയം ഫൊറോന പള്ളിയില്‍ എട്ടുനോമ്പാചരണത്തിനും പരിശുദ്ധ ദൈവമാതാവിന്റെ ജനനതിരുനാളിനുമുള്ള ഒരുക്കങ്ങള്‍ പൂര്‍ത്തിയാവുന്നു. കാരുണ്യവര്‍ഷത്തിലെ എട്ടുനോമ്പാചരണത്തിലേക്ക് ഇക്കുറി ഇടവക പ്രവേശിക്കുന്നത് അഭിഷേകാഗ്നി കണ്‍വന്‍ഷനിലൂടെയാണെന്നത് പ്രത്യേകതയാണ്.
സെപ്റ്റംബര്‍ ഒന്നിനു കൊടിയേറുന്ന തിരുനാളിന്റെ ഒരോ ദിവസവും പ്രത്യേക ദിനാചരണം നടത്തുന്നുണ്ട്. ഒന്നിനു കുടുംബകൂട്ടായ്മാ ദിനം, മാസാദ്യ വെള്ളിയാഴ്ചയായ രണ്ടിനു കുമ്പസാരദിനം, മൂന്നിനു കര്‍ഷക ദിനവും കൃതജ്ഞതാ ദിനവും മദര്‍തെരേസയുടെ വിശുദ്ധ പദവി പ്രഖ്യാപന ദിനമായ നാലിന് സമര്‍പ്പിതരുടെ ദിനം, അഞ്ചിനു സംഘടനാ ദിനം, ആറിന് വാഹനസമര്‍പ്പണ ദിനം, ഏഴിന് സമര്‍പ്പണ ദിനം എന്നിങ്ങനെയാണ് ദിനാചരണങ്ങള്‍. പ്രധാന തിരുനാള്‍ ദിനമായ എട്ടിനു മേരിനാമധാരി സംഗമവും നടക്കും.