കോഴിക്കോട്: സംസ്ഥാന സ്‌കൂള്‍ ശാസ്‌ത്രോത്സവത്തോടനുബന്ധിച്ച് വീട്ടമ്മമാര്‍ക്കായി വ്യത്യസ്തമായ മത്സരം. ഗ്രീന്‍ പ്രോട്ടോകോള്‍ കമ്മിറ്റിയുടെ ആഭിമുഖ്യത്തിലാണ് കോര്‍പറേഷന്‍ പരിധിയിലെ വിവിധ കുടുംബശ്രീ യൂനിറ്റുകള്‍ക്കു കീഴിലെ വനിതകള്‍ക്കായി ഓലക്കൊട്ട നിര്‍മാണ മത്സരം നടത്തിയത്. 22 വീട്ടമ്മമാര്‍ മത്സരത്തില്‍ പങ്കെടുത്തു.
അധ്യാപികയായ റുഖിയയുടെ നിയന്ത്രണത്തിലായിരുന്നു മത്സരം. പത്താം വാര്‍ഡ് തേജസ് കുടുംബശ്രീ യൂനിറ്റിലെ രുഗ്മിണി ഒന്നാം സ്ഥാനം നേടി. ഒന്‍പതാം വാര്‍ഡിലെ ജാസ്മിന്‍ കുടുംബശ്രീയിലെ ഉഷ രണ്ടാം സ്ഥാനത്തെത്തി. 65-ാം വാര്‍ഡിലെ സണ്‍ഫ്‌ളവര്‍ കുടുംബശ്രീയിലെ ചന്ദ്രികയ്ക്കാണ് മൂന്നാംസ്ഥാനം.
മലബാര്‍ ക്രിസ്ത്യന്‍ കോളജ് ഗ്രൗണ്ടില്‍ തെങ്ങോലകള്‍ ഉപയോഗിച്ചു നടത്തിയ മത്സരം കോര്‍പറേഷന്‍ ആരോഗ്യ സ്റ്റാന്‍ഡിങ് കമ്മിറ്റി ചെയര്‍മാന്‍ ബാബുരാജ് ഉദ്ഘാടനം ചെയ്തു. ശുചിത്വമിഷന്‍ കോഡിനേറ്റര്‍ സി. കബനി അധ്യക്ഷയായി. കോര്‍പറേഷന്‍ കൗണ്‍സിലര്‍മാരായ കിഷന്‍ചന്ദ്, ബാവ, അനൂപ്കുമാര്‍, പി. ഷംസുദ്ദീന്‍, വി.വി.എം ബഷീര്‍ സംസാരിച്ചു.