കരൂപ്പടന്ന: നടവരമ്പ് മോഡല്‍ ഗവ: ഹയര്‍ സെക്കന്ററി സ്‌കൂളില്‍ കൊയ്ത്തുത്സവം തുടര്‍ച്ചയായി ഒമ്പതാം വര്‍ഷത്തിലേക്ക്. സ്‌കൂളിന് സ്വന്തമായുള്ള രണ്ടര ഏക്കര്‍ പാടത്ത് പൂര്‍ണ്ണമായും ജൈവവളങ്ങളും ജൈവ കീടനാശിനികളും മാത്രം ഉപയോഗിച്ച് നടത്തിയ കൃഷിയുടെ വിളവെടുപ്പ് ജില്ലാ പഞ്ചായത്ത് അംഗം ടി.ജി ശങ്കരനാരായണന്‍ ഉദ്ഘാടനം ചെയ്തു. സ്‌കൗട്ട്, ഗൈഡ്, എന്‍.എസ്.എസ് യൂണിറ്റ് എന്നിവയുടെ നേതൃത്വത്തില്‍ അധ്യാപകരും കുട്ടികളും പി.ടി.എയും സംയുക്തമായാണ് കൃഷി ചെയ്യുന്നത്. സ്‌കൗട്ട് മാസ്റ്ററും കാര്‍ഷിക ക്ലബ് കണ്‍വീനറുമായ അനീഷ് കുമാര്‍ നേതൃത്വം നല്‍കി. കുട്ടികളും അധ്യാപകരും കൊയ്ത്തുത്സവത്തില്‍ പങ്കെടുത്തു. കൊയ്‌തെടുത്ത കറ്റകള്‍ കുട്ടികള്‍ തന്നെ മെതിച്ച് ഉമി മാത്രം കുത്തിയ ശേഷം കുട്ടിയരി എന്ന പേരില്‍ വിപണനം നടത്താറുണ്ട്. പി.ടി.എ പ്രസിഡന്റ് എം.കെ മോഹന്‍, പ്രിന്‍സിപ്പാള്‍ എം.നാസറുദീന്‍, പ്രധാനാധ്യാപിക റോസി, വി.എച്ച്.എസ്.സി പ്രിന്‍സിപ്പാള്‍ മനു, കൃഷി ഓഫീസര്‍ ജെസ്സി, ഗൈഡ് ക്യാപ്റ്റന്‍ സി.ബി ഷക്കീല, എന്‍.എസ്.എസ് കോര്‍ഡിനേറ്റര്‍ റോഫി, സീമ ഷെമി, ജെസീന ,വിദ്യ, സുരേഷ് കുമാര്‍ എന്നീ അധ്യാപകരും ഗൈഡ് ലീഡര്‍ നൈമ, സ്‌കൗട്ട് ലീഡര്‍ അഖില്‍ അഹമ്മദ് എന്നിവരുടെ നേതൃത്വത്തിലുള്ള കുട്ടികളും പങ്കെടുത്തു.