കണ്ണൂര്‍: സിറിയയില്‍ പോയി നിരോധിത സംഘടനയായ ഐ.എസുമായി ബന്ധപ്പെട്ടു പ്രവര്‍ത്തിച്ച കേസില്‍ അറസ്റ്റിലായ പ്രതികളില്‍ മൂന്നു പേരെ അന്വേഷണ സംഘം തെളിവെടുപ്പിനായി ചെന്നൈയില്‍ എത്തിച്ചു.
പൊലിസ് കസ്റ്റഡിയില്‍ ലഭിച്ച തലശ്ശേരി കുഴിപ്പങ്ങാട്ടെ തൗഫീഖ് മന്‍സിലില്‍ താലിബാന്‍ ഹംസയെന്ന യു.കെ ഹംസ(57), മുണ്ടേരി കൈപ്പക്കൈയില്‍ ബൈത്തുല്‍ ഫര്‍സാനയില്‍ മിഥ്‌ലാജ്(26), മുണ്ടേരി പടന്നത്തോട് മെട്ടയിലെ എം.വി റാഷിദ്(24) എന്നിവരെയാണ് ചെന്നെയില്‍ എത്തിച്ചത്. ഇവരെ നാലു ദിവസത്തേക്കാണ് കോടതി പൊലിസ് കസ്റ്റഡിയില്‍ വിട്ടു നല്‍കിയത്. സി.ഐ വി.വി ബെന്നിയുടെ നേതൃത്വത്തിലുള്ള അന്വേഷണ സംഘമാണ് പ്രതികളെ തെളിവെടുപ്പിനായി കൊണ്ടുപോയിരിക്കുന്നത്. ഇവരുടെ വിദേശയാത്രകള്‍ സംബന്ധിച്ചുള്ള രേഖകള്‍ കണ്ടെടുക്കാനാണ് അന്വേഷണ സംഘത്തിന്റെ ശ്രമം.